Прэм’ер Польшчы мяркуе, што Пуцін і Лукашэнка могуць ізноў кінуць мігрантаў на штурм польскай мяжы
Прэм’ер-міністр Польшчы Матэўш Маравецкі заявіў, што дагэтуль існуе пагроза штурму польска-беларускай мяжы мігрантамі. Пра гэта паведамляе PAP.
«Калі мець на ўвазе яшчэ адну такую атаку штучна завезеных, шляхам спецаперацыяў беларускіх і расейскіх службаў, мігрантаў, якія будуць штурмаваць мяжу, то, найхутчэй, так. Такія атакі яшчэ магчымыя», – прызнаў прэмʼер.
Прэмʼер-міністр падкрэсліў, што «сёння трэба мець на ўвазе сцэнар, паводле якога Пуцін і Лукашэнка могуць адначасова пагражаць Украіне з паўночнай ці паўночна-заходняй мяжы, г. зн. на беларуска-ўкраінскай мяжы, і пры гэтым пачаць штурм мігрантамі, то бок задзейнічаць яшчэ дзясяткі тысяч асобаў з Блізкага Усходу, Афрыкі і Сярэдняй Азіі – толькі для дэстабілізацыі сітуацыі», – сказаў Маравецкі.
Тым не менш, паводле яго, «каб не стаць абʼектам правакацыяў з боку Менску і Масквы, Польшча пабудавала вельмі трывалую, напэўна, нават самую надзейную ў Еўропе фізічную перашкоду вышынёй больш як пяць метраў, з усімі сродкамі абароны і вельмі развітой электронікай».
16 лістапада 2021 года група мігрантаў на пераходзе «Кузніца – Брузгі» атакавала польскіх памежнікаў, спрабуючы незаконна прарвацца на тэрыторыю Польшчы. На відэа, што апублікавала Міністэрства абароны Польшчы, відаць, што за спінамі мігрантаў стаялі сілавікі, якія не давалі ім адысці ад мяжы. А паводле польскай Памежнай аховы, беларускі бок забяспечыў мігрантаў спецсродкамі.
Спыніць мігрантаў на беларуска-польскай мяжы ўдалося пасля таго, як польскія службоўцы выкарысталі слезацечны газ і вадамёт.
Якуб Хруст belsat.eu
