«Каманда праганяць праз ІЧУ». BYPOL распавёў, як ГУБАЗіК ладзіць аперацыі «адплаты» супраць мірных пратэстоўцаў
Арганізацыя апазіцыйных беларускіх сілавікоў «BYPOL» апублікавала новае расследаванне адносна дзейнасці ГУБАЗіК. Матэрыяламі для расследавання сталі аўдыязапісы, атрыманыя кібер-партызанамі.
У прыватнасці, распавядаецца, як ладзіліся, згодна з тэрміналогіі ГУБАЗіКа, «вайсковыя аперацыі» і «аперацыі адплаты» супраць меркаваных удзельнікаў мірных пратэстаў у Новай Баравой і Дзяржынску напярэдадні Дня Волі 2021 года.
Паводле апублікаванай размовы начальніка крымінальнай міліцыі УУС Менскай вобласці Аляксандра Копішава і ягонага намесніка Ігара Качалава, была пастаўленая задача, каб «да 25 сакавіка была зусім цішыня». Непасрэдна кіраваў карнымі акцыямі, паводле «BYPOL», прадстаўнік ГУБАЗіКу палкоўнік міліцыі Аляксандр Алекса, які каардынаваў правядзенне аперацыі і асабіста катаваў затрыманых.
Пры гэтым была пастаўленая задача падчас ператрусаў, насуперак Працэсуальна-выканаўчага кодэкса аб адміністратыўных правапарушэннях (ПІКаАП) ламаць дзверы у пратэстоўцаў.
«З САХРам калі ламаць дзверы, то ў рамках ПІКаАПа так не зробіш, б…ь, прыгожа, як мы планавалі», – кажа на відэа Віталь Федарэц, начальнік 10 упраўлення ГУБАЗіК Менскай вобласці.
Паводле яго, стаіць задача «прыгожа адпрацаваць адрасы ў Дзяржынску», але «ў межах ПІКаАПа не той эфект».
«BYPOL» адзначае, што для правядзення ператрусаў следчымі складалі фіктыўныя рапарты, а самыя аперацыі ладзілі ўжо групы «помсты» ў складзе супрацоўнікаў ГУБАЗіКа, АУС, АМАП, САХР і загадзя падрыхтаваных панятых.
«Калі, уявім, знаходзім нейкую сімволіку, – прыцягванне да адміністратыўнай [адказнасці. – Рэд. Belsat.eu]. Калі не, тады афармляем непадпарадкаванне. Каманда праганяць праз ІЧУ», – кажа Федарэц.
Іншыя падрабязнасці расследавання ў відэа «BYPOL»:
МГ belsat.eu
