«Балтыйскае мора будзе ўнутраным морам NATO». Эстонскі міністр – пра супольныя планы з Фінляндыяй
Міністр абароны Эстоніі Ханна Пэўкур у інтэрв’ю «Iltalehti» распавёў пра планы дзвюх краінаў для ўмацавання супольнай вайсковай абароны ад расейскай пагрозы.
«Мы абʼяднаем нашую супрацьракетную абарону і будзем дзяліцца ўсёй інфармацыяй», – заявіў Пэўкур.
У выніку супольная супрацьракетная абарона можа закрыць Фінскую затоку ад расейскіх вайсковых караблёў.
«Дальнасць дзеяння эстонскіх і фінскіх ракетаў перавышае шырыню Фінскай затокі», – адзначыў міністр.
Агулам, сказаў Пэўкур, «Балтыйскае мора будзе ўнутраным морам NATO, калі да NATO далучацца Фінляндыя і Швецыя».
«Усе павінны разумець, што Нарвегія, Фінляндыя, краіны Балтыі ды іншыя краіны складаюць усходнюю галіну NATO. Мы абараняем не толькі Фінляндыю, Эстонію, Латвію, Літву ці іншыя краіны ўсходняга боку NATO, а ўсё разам. Калі мы гаворым пра NATO, крытычным пытаннем ёсць артыкул 5: адзін за ўсіх і ўсе за аднаго», – падкрэсліў Пэўкур.
Швецыя і Фінляндыя доўгія гады трымаліся нейтралітэту, але з прычыны расейскага ўварвання ва Украіну абедзве краіны ў траўні заявілі, што хочуць далучыцца да NATO. 29 чэрвеня вайсковы альянс афіцыйна запрасіў дзве скандынаўскія краіны далучыцца да групы. Гэта самае значнае пашырэнне вайсковага альянсу з 1990-х гадоў.
Якуб Хруст belsat.eu
