Старшыня Партыі БНФ застаецца ў СІЗА КДБ, але яго возяць да медыкаў.
Інэса Аленская, адвакатка Рыгора Кастусёва, расказала «Еўрарадыё», што зняволенаму палітыку дазволілі праходзіць медычнае абследаванне.
У Кастусёва падазраюць анкалагічнае захворванне, ён адчувае сябе кепска, не можа спаць уначы і пастаянна скардзіцца на здароўе. Нягледзячы на гэта, яму тройчы адмаўлялі змяніць меру стрымання, ён застаецца ў следчым ізалятары Камітэту дзяржаўнай бяспекі.
64-гадовы Кастусёў быў затрыманы 12 красавіка адначасова з юрыстам Юрыем Зянковічам і літаратуразнаўцам Аляксандрам Фядутам. Яны праходзяць падазраваным у крымінальнай справе аб «захопе ўлады» і спробе замаху на Аляксандра Лукашэнку. Кастусёў адмаўляе датычнасць да замаху.
У траўні Кастусёў трапіў у турэмны шпіталь праз пагаршэнне здароўя, там і западозрылі анкалагічнае захворванне, але абследавання не праводзілі тры месяцы.
АА belsat.eu
