Літва дае квіткі на самалёт і 300 еўра тым мігрантам, якія нелегальна прайшлі ў краіну з Беларусі і якія хочуць дамоў.
Вечарам 12 жніўня з Вільні праз Стамбул паляцеў першы грамадзянін Іраку, які нелегальна перайшоў беларуска-літоўскую мяжу і пагадзіўся добраахвотна вярнуцца дамоў, піша Delfi.
Гэты мігрант перайшоў мяжу 20 чэрвеня. Ён прасіў прытулку ў Літве, але не атрымаў такога права. У яго былі з сабой дакументы, ён сам выказаў жаданне паляцець дамоў, таму такую магчымасць яму далі.
«Мы бачым, што расце колькасць ахвочых вярнуцца на радзіму па сваёй волі, – заяўляе міністарка ўнутраных справаў Літвы Агне Білатайце. – Нелегальныя мігранты, якія не атрымалі прытулак, павінны будуць пакінуць Літву. Калі яны супрацоўнічаюць і згаджаюцца вярнуцца, мы даем ім такую магчымасць».
У бліжэйшы час такім чынам з Літвы маюць паляцець яшчэ «каля дзесяці» мігрантаў. Агулам Літва разглядзела ўжо 128 заявак на прытулак ад такіх мігрантаў, не задаволіла ніводнай.
А з пачатку году на мяжы з Беларуссю затрымалі 4115 мігрантаў – большасць з іх паходзяць з Іраку, ёсць нямала грамадзянаў краінаў Азіі і Афрыкі, а колькасць беларусаў зусім нязначная.
Абноўлена. За мінулы дзень літоўскія памежнікі «развярнулі» ў Беларусь 19 мігрантаў, якія спрабавалі перайсці мяжу незаконна, але прынялі двух з гуманітарных прычынаў, піша Delfi.