Працэс у новай крымінальнай справе супраць журналісткі Кацярыны Андрэевай пачаўся 4 ліпеня, але 6 ліпеня суддзя Гомельскага абласнога суда абвясціў перапынак да 13 ліпеня. Нашай каляжанцы пагражае да 15 гадоў пазбаўлення волі.
Абноўлена. Кацярыне Андрэевай прысудзілі яшчэ 8 гадоў зняволення.
Пачатак новага паседжання а 10:00.
Суд праходзіць у закрытым рэжыме. Палітзняволенай выставілі абвінавачванне паводле ч. 1 арт. 356 Крымінальнага кодэксу («Здрада дзяржаве»). Што канкрэтна інкрымінуецца журналістцы і на аснове якіх падзеяў узнікла абвінавачванне – невядома. На справу быў накладзены грыф сакрэтнасці. Адвакат Кацярыны застаецца пад строгай падпіскай аб нераскрыцці і ніякіх акалічнасцяў не можа распавесці нават сваякам.
Як паведаміў муж Кацярыны Ігар Ільяш, вырак будзе агучаны сёння а 12:00.
Кацярыну Андрэеву разам з журналісткай Дар’яй Чульцовай затрымалі 15 лістапада 2020 года за стрым, падчас якога паказалі жорсткі разгон акцыі памяці Рамана Бандарэнкі і разбурэнне сілавікамі народнага мемарыялу на плошчы Пераменаў.
Свой тэрмін Кацярына адбывала ў папраўчай калоніі № 4 у Гомлі, ён мусіў завяршыцца 5 верасня 2022 года. Але 10 лютага Кацярыну раптам этапавалі ў гомельскае СІЗА. Цягам 55 дзён сваякі не ведалі, у якім статусе яе трымаюць і ў межах якой справы.
7 красавіка сям’і палітзняволенай стала вядома, што Кацярыне выставілі абвінавачванне паводле ч. 1 арт. 356 Крымінальнага кодэксу («Здрада дзяржаве»). Паводле гэтага артыкулу ёй пагражае ад 7 да 15 гадоў зняволення.