Камітэт правоў чалавека ААН забараніў Расеі экстрадаваць у Беларусь Яну Пінчук
Расейскі суд у чэрвені пастанавіў выдаць у Беларусь 25-гадовую актывістку, затрыманую ў мінулым лістападзе на запыт беларускіх сілавікоў. Яе ў Беларусі лічаць адміністратаркай Telegram-каналу «Витебск 97%», вінавацяць паводле пяці палітычных артыкулаў.
Маскоўская Хельсінкская група паведаміла вечарам 12 ліпеня аб адказе Камітэту правоў чалавека Арганізацыі аб’яднаных нацыяў на іх зварот адносна беларускі Яны Пінчук: Камітэт прызнаў абгрунтаванымі рызыкі непапраўнай шкоды ў выпадку экстрадыцыі яе ў Беларусь і папрасіў урад Расеі ўстрымацца ад выдачы, каб даць Пінчук доступ да ўнутраных працэдураў атрымання прытулку.
Таксама Камітэт прасіў расейскі ўрад забяспечыць Пінчук неадкладны доступ да прадметаў першай неабходнасці і забяспечыць абарону ейнага жыцця, фізічнай і псіхічнай недатыкальнасці, пакуль ейная справа застаецца на разглядзе Камітэту.
Ці спыніць гэта экстрадыцыю, невядома: Расея раней выдавала Беларусі палітычных зняволеных (напрыклад, у студзені выдала беларускім уладам 25-гадовага Дзмітрыя Падлобнікава), нягледзячы на пастановы Еўрапейскага суда правоў чалавека, а ў сакавіку выйшла з Рады Еўропы і адмовілася выконваць рашэнні ЕСПЧ. Цяпер КПЧ ААН настойвае, што непрыняцце захадаў, аб якіх просіць Камітэт, несумяшчальнае з Міжнародным пактам аб грамадзянскіх і палітычных правах, які Расея падпісала і ратыфікавала (яшчэ як Савецкі Саюз).
Яна Пінчук пераехала ў Расею яшчэ ў 2018 годзе. Яе затрымалі 1 лістапада 2021 года ў Санкт-Пецярбурзе на запыт беларускіх сілавікоў. 3 лістапада мясцовы раённы суд абраў для яе меру стрымання ў выглядзе ўтрымання пад вартай. На радзіме за адміністраванне тэлеграм-каналу «Витебск 97%» супраць Яны Пінчук выставілі абвінавачванні паводле пяці крымінальных артыкулаў: «Распальванне нацыянальнай варожасці» (ч. 3 арт. 130 КК РБ), «Заклікі да дзеянняў супраць нацыянальнай бяспекі» (ч. 3 арт. 361), «Паклёп» (арт. 188) і іншыя. Ёй можа пагражаць да 12 гадоў зняволення.
Расейскія суды адмовілі ёй у прытулку і пастанавілі экстрадаваць яе ў Беларусь. 13 ліпеня ў Другім апеляцыйным судзе Санкт-Пецярбургу будзе апошні суд адносна выдачы Пінчук у Беларусь.
Абноўлена. Новы суд аб экстрадыцыі Яны Пінчук, які быў запланаваны на 13 ліпеня, перанеслі на 21-га, піша «Медыязона». Прычына – падсуднай не паведамілі аб прызначэнні суду своечасова.
Падчас перабывання за кратамі Яна паспела выйсці замуж. Яе прызналі палітычнай зняволенай праваабаронцы расейскага «Мемарыялу».
Алесь Наваборскі belsat.eu
