Пасля двух тураў галасавання нямецкая грамадзянская ініцыятыва «AnStifter» уганаравала палітзняволеную Марыю Калеснікаву Штутгарцкай прэміяй міру – 2021.
Да 2020 года Марыя Калеснікава 12 гадоў жыла ў Штутгарце, дзе працавала, сярод іншага, кіраўніцаю праекту фестывалю «Artemp». Потым яна вярнулася ў Беларусь у якасці менеджара кампаніі кандыдата ў прэзідэнты Віктара Бабарыкі.
«Калеснікава стала ключавой фігурай у пратэстах супраць Аляксандра Лукашэнкі, які кіруе Беларуссю аўтарытарна на працягу 26 гадоў», – гаворыцца ў заяве арганізацыі.
Штутгарцкая прэмія міру прысуджаецца грамадзянскім праектам «AnStifter» і Фондам Штутгарцкай прэміі міру людзям і праектам, якія асабліва адданыя міру, справядлівасці, грамадзянскай мужнасці і салідарнасці.
Прэмія прысуджаецца штогод. Сёлета цырымонія ўзнагароджання пройдзе 19 снежня ў «Тэатрхаўсе» ў Нямеччыне.
АД, belsat.eu
