Кіраўнік кабінету Святланы Ціханоўскай Валер Кавалеўскі распавёў пра размову з дзейнымі сілавікамі Беларусі і пра настроі ўнутры сілавых структураў.
«Мы пачулі, што сілавікоў – галоўную сваю апору – рэжым пастаянна падвяргае стрэсу і праверкам, рэгулярна шукае здраднікаў: параноя дакацілася да спробаў усталяваць кантроль над асабістымі кантактамі і падпіскамі ў «Тэлеграме» кожнага сілавіка. Праверка тэлефонаў стала звычайнаю практыкай. Адток кадраў не спыняецца», – заявіў Кавалеўскі.
Паводле кіраўніка кабінету Ціханоўскай, «ад сітуацыі пачынаюць стамляцца нават тыя іх калегі, якія раней не мелі канкрэтнай пазіцыі і не былі прыхільнікамі пратэстоўцаў»:
«Шмат хто называе Лукашэнку збітым лётчыкам, але не ведае, які будзе іхны лёс пасля таго, як ягоны час ва ўладзе падыдзе да канца».
Кавалеўскі падкрэсліў з гэтай прычыны, што «званні і рангі супрацоўнікаў і дыпламатаў, якія страцілі іх за дапамогу пратэсту, будуць адноўленыя, выслуга за сапраўдную службу радзіме ды абарону свайго народу і інтарэсаў дзяржавы будзе захаваная».
«Гэта датычыць і тых, хто рызыкуе кожны дзень і дапамагае нам знутры: вашыя смеласць і сумленнасць будуць годна ацэненыя», – дадаў ён.
Кіраўнік кабінету таксама адзначыў: тыя ж, хто не здзяйсняў цяжкіх і асабліва цяжкіх злачынстваў, «таксама змогуць застацца на сваіх месцах і працягваць службу, дзяржава не будзе пераследаваць або люстраваць такіх супрацоўнікаў».
МГ belsat.eu