Аператыўнае камандаванне Польшчы абвяргае паведамленне Мінабароны Беларусі пра парушэнне беларускай паветранай мяжы. Мінабароны нашай краіны заявіла, што ўчора вечарам адбылося парушэнне паветранай прасторы Беларусі з боку Польшчы. У сваю чаргу ў Варшаве сцвярджаюць, што 12 красавіка паблізу мяжы не было аніякіх палётаў.
Польшча заявіла, што палёты паблізу польска-беларускай мяжы 12 красавіка не выконваліся.
«Ладзіцца сталы маніторынг паветранай прасторы. Вайсковыя самалёты вечарам 12.04 бягучага году не выконвалі палётаў паблізу дзяржаўнай мяжы паміж Польшчай і Беларуссю», – заяўляе аператыўнае камандаванне Узброеных сіл Польшчы ў Twitter.
Міністэрства абароны Беларусі заявіла, што ўчора а 20:45 неўстаноўленае паветранае судна парушыла дзяржаўную мяжу Беларусі з боку Польшчы і потым вярнулася на польскую тэрыторыю. Мінабароны нават выклікала аташэ пры пасольстве Польшчы і запатрабавала зладзіць разгляд і праінфармаваць аб яго выніках.
СК belsat.eu