З акна шматкватэрнага дому ў Чарнігаве ўкраінскія ратавальнікі дастаюць снарад. Яго вага – 500 кілаграмаў. Расейская армія працягвае абстрэльваць жылыя дамы і грамадскія будынкі.
Паводле звестак пракуратуры Украіны, у выніку бамбаванняў і абстрэлаў пашкоджана 369 навучальных установаў. Загінулі ўжо 85 дзяцей, больш за 100 параненыя.
Гэтыя дзеткі засталіся сіротамі. Рэзка асудзіў расейскую агрэсію супраць Украіны Папа Рымскі Францішак:
«Бамбёжкі дзіцячых больніцаў і грамадзянскіх аб’ектаў – варварства, у якога няма ніякага стратэгічнага абгрунтавання. Усё, што неабходна, – гэта спыніць непрымальную ўзброеную агрэсію да таго, як яна ператворыць гарады ў могілкі. У імя Бога, хай будуць пачутыя крыкі тых, хто пакутуе, і спыняцца бамбаванні і абстрэлы! Хай будзе рэальны і рашучы акцэнт на перамовах, хай гуманітарныя калідоры будуць эфектыўныя і бяспечныя. Імем Бога прашу вас: спыніце гэтую бойню!»
Кіраўнік жа Расейскай праваслаўнай царквы прасіў Бога аб захаванні РПЦ ва Украіне і папракаў украінскіх святароў, якія адмаўляюцца згадваць яго на набажэнствах.
«Сёння не згадваем патрыярха, бо страшна, а заўтра хтосьці можа запатрабаваць большага. Няхай Гасподзь захоўвае нашу царкву на зямлі ўкраінскай», –
сказаў падчас казані Патрыярх Маскоўскі і ўсяе Русі Кірыл.
У іх няма нічога святога – упэўненыя жыхары Святагорску Данецкай вобласці, дзе расейскія войскі абстралялі Святагорскую Лаўру. У манастыры хаваліся больш як паўтысячы бежанцаў, з іх 200 – дзеці.
«На гэты момант людзі застаюцца ў лаўраўскіх падвалах у стрэсавай сітуацыі, у дзяцей істэрыка. Ніякіх вайсковых злучэнняў у горадзе Святагорску і на тэрыторыі Святагорскай Лаўры не было, гэта значыць, што ўдар быў нанесены па мірным горадзе і па адной з трох святыняў Украіны – Святаўспенскай Святагорскай лаўры», – распавёў мітрапаліт Святагорскі Арсень.
Паветраная сірэна ў Кіеве. У храм прыходзяць маліцца жыхары гораду і вайскоўцы. «Мы молімся і дабраслаўляем зброю, каб выпадковая куля не прычыніла шкоды грамадзяніну Украіны, і ні ў якім разе не магла прычыніць шкоды нічому іншаму, акрамя зла», – кажа вайсковы капелан Мікола Мядзінскі.
«Гэта малітва дабраславення ўкраінскага ваяра і ягонай зброі на абарону ўкраінскай зямлі, жыцця і Божай праўды», – сказаў айцец Мікола.
Святыя кнігі кажуць, што непазбежна адбудзецца перамога праўды і дабра і пакаранне тых, хто здзяйсняе злачынствы.
Вольга Старасціна/ІР belsat.eu
