Былы загадчык аддзялення анестэзіялогіі і рэанімацыі віцебскай БХМД Уладзімір Мартаў у сваім Facebook адказаў Аляксандру Лукашэнку на ягоныя словы пра перабоі з падачай кіслароду ў той больніцы.
Падчас наведвання маладзечанскай больніцы 12 сакавіка Аляксандр Лукашэнка спытаў у міністра аховы здароўя Дзмітрыя Піневіча пра гэтае здарэнне. Той адказаў, што былі «невялікія перабоі».
– Ну калі там палітыка, то значыць, на месца чалавека трэба ставіць, – заявіў Лукашэнка.
– Паставім, – паабяцаў Піневіч.
– Нам не да палітыкі цяпер. Трэба спыняць такія рэчы. Калі там сапраўды ёсць праблема, то яе трэба вырашаць, – працягнуў Лукашэнка.
Уладзімір Мартаў не пакінуў гэтыя словы без адказу.
«Падача кіслароду не залежыць ад таго, апазіцыянер загадчык аддзялення ці не. Палітызацыя пытання – гэта пра што? А гэта яно самае: «Патрыятызм – апошні прыстанак нягодніка»», – напісаў Мартаў.
У пачатку сакавіка з Мартавым адмовіліся падоўжыць працоўны кантракт праз тое, што ён адкрыта выказваўся аб праблемах пандэміі і сітуацыі ў краіне. Пасля звальнення доктар распавёў пра гэты выпадак з перабоямі падачы кіслароду.
ЯП belsat.eu
