У судзе Кастрычніцкага раёну Горадні 12 лютага суддзя Дзмітрый Кедаль працягнуў разгляд крымінальнай справы Васіля Пільца, якога пракурор Алена Пронька вінаваціла ў хуліганстве (ч.1 арт. 339 КК). Нібыта Васіль штурхануў агрэсіўных прыхільнікаў Аляксандра Лукашэнкі і актывістаў руху «Антывандал», паведамляе «Вясна».
Пацярпелыя па справе Вольга Бондарава і Аляксандр Галахаў, руху актывісты «Антывандал», які не мае рэгістрацыі, але падтрымліваецца ўладай.
Поводле следства, 14 снежня Васіль Пілец аказаў гвалт у дачыненні да Галахава і Вольгі Бондаравай, якія зафарбоўвалі на ходніках выявы бчб-сцягоў, штурхнуў іх, хапаў іх за вопратку, штурхаў, сарваў маску, тым самым прычыніў пацярпелым фізічны боль.
Адвакат запытаўся ў пацярпелай Вольгі Бондаравай, ці прыцягвалася яна да адміністрацыйнай адказнасці?
«Так».
«А да крымінальнай, за кантрабанду цыгарэт у Польшу?»
«Таксама так».
Адвакат пытаецца зноў:
«У заключэнні судмедэкспертызы не зафіксавана нанясенне вам цялесных пашкоджанняў?»
Бондарава адказвае: «Не. Прычыненая боль з’яўляецца цялесным пашкоджаннем».
Адвакат таксама нагадвае, што абвінавачваны быў узяты пад варту з запаленнем лёгкіх са станоўчым тэстам на COVID.
Пракурор прасіла 2 гады абмежавання волі і адзначыла, што Пілец, выказваючы грэбаванне да грамадства, ужыў гвалт да Бондаравай і Галахава, кінуўся на іх, абражаў, ужыў гвалт і перакуліў банку з фарбай, а пацярпелыя выконвалі свой дзяржаўны доўг па зафарбоўванню незарэгістраванай сімволікі.
Суддзя выносіць прысуд: адзін год абмежавання волі без накіравання ва ўстанову адкрытага тыпу. Пільца вызваліць з-пад варты, адмяніць арышт на маёмасць.
МГМ belsat.eu