Аляксандр Лукашэнка ўжо таксама прызямліўся ў аэрапорце Каракасу, каб узяць удзел у жалобных мерапрыемствах з нагоды смерці прэзідэнта Венесуэлы Уга Чавэса.
Спачатку Лукашэнка хацеў адправіць у Венесуэлу кіраўніка справамі прэзідэнта Віктара Шэймана і першага віцэ-прэм’ера Уладзіміра Сямашку, першы з якіх – сустаршыня беларуска-венесуэльскай камісіі высокага ўзроўню, другі –сустаршыня беларуска-венесуэльскай супольнай камісіі гандлёва-эканамічнай супрацы.
Аднак у выніку не вытрываў і паляцеў сам. «Аляксандр Лукашэнка прыняў рашэнне адправіцца ў Каракас, нягледзячы на шэраг візітаў, якія чакаюцца ў найбліжэйшы час, і загружанасць свайго працоўнага графіку, – зазначае прэс-служба прэзідэнта Беларусі. – Гэта звязанае з тым, што Уга Чавэс не меў больш блізкіх і сяброўскіх стасункаў ні з адным з кіраўнікоў замежных дзяржаў, як з прэзідэнтам Беларусі».
Тым часам пахаванне, запланаванае на 8 сакавіка, адклалі амаль на тыдзень, бо не ўсе, хто хацеў, змаглі развітацца з камандантэ, паведамляюць мясцовыя медыі. Учора выканаўца абавязкаў кіраўніка дзяржавы віцэ-прэзідэнт Нікаляс Мадура заявіў, што ўлады Венесуэлы прынялі рашэнне забальзамаваць цела Уга Чавэса, «як цела Хо Шы Міна (Hồ Chí Minh), як цела Леніна, як цела Маў Цзэ Дуна, каб яго можна было бачыць вечна ў шкляной труне».
Між іншым, такое адказнае заданне лагічна было б даверыць расейскім адмыслоўцам, паведамляе ІТАР-ТАСС. «Айчынныя тэхналогіі бальзамавання цалкам перадавыя. Гэткая практыка існуе шмат гадоў і дэталёва адпрацаваная», – цытуе – агенцтва неназваных адмыслоўцаў, якія яшчэ ў савецкія часы займаліся падтрыманнем цела Леніна.
Уга Чавэс памёр 5 сакавіка. У сувязі з гэтым у Беларусі аб’явілі трохдзённую жалобу.
Аліна Кашкевіч, belsat.eu