У Маладзечне мужчыну прысудзілі 1,5 года хатняй «хіміі» за абразу палкоўніка Карпянкова

Суд Маладзечанскага раёну агучыў прысуд мясцоваму жыхару Аляксандру Самалю, якога абвінавачвалі ў абразе начальніка ГУБАЗіКу МУС РБ Мікалая Карпянкова (арт. 369 КК). Вырак – паўтара года хатняй «хіміі», паведамляе праваабарончы цэнтр «Вясна».

Паводле матэрыялаў справы, маладзечанец абразіў былога начальніка ГУБАЗіКу (цяпер – намесніка міністра ўнутраных справаў) Мікалая Карпянкова ў сацсетцы «Одноклассники». А менавіта, «маючы намер публічна абразіць прадстаўніка ўлады ў звязку з выкананнем ім службовых абавязкаў, пасля прагляду публікацыі пра Мікалая Карпянкова наўмысна размясціў абразлівы каментар, які мае зняважлівую і непрыстойную форму маўленчага выказвання».

«Справу Аляксандра Самаля» разглядаў суддзя Дзяніс Барэйка. Ён прызнаў мужчыну вінаватым у злачынстве, прадугледжаным арт. 369 КК, і пакараў яго абмежаваннем волі без накіравання ва ўстанову адкрытага тыпу тэрмінам на 1 год і 6 месяцаў. Суд таксама спагнаў з падсуднага Br 1000 маральнай кампенсацыі для Карпянкова.