Інфармацыйнае агенцтва «БелаПАН» рашэннем КДБ прызнанае экстрэмісцкім фармаваннем. Інфармацыя пра гэта з’явілася ў пераліку арганізацыяў, фармаванняў, ІП, якія маюць дачыненне да экстрэмісцкай дзейнасці, які вядзе МУС Беларусі.
КДБ лічыць экстрэмісцкім фармаваннем «групу грамадзян з ліку супрацоўнікаў інфармацыйнага агенцтва ЗАТ «БелаПАН». Рашэнне прынятае 1 лістапада 2021 года.
Лагатып у выглядзе надпісу «БЕЛАПАН» з выявай вершніка з мячом верхам на кані чырвонага колеру ў верхнім правым куце КДБ таксама будуць лічыць экстрэмісцкім.
Нагадаем, што з лета за кратамі знаходзяцца галоўная рэдактарка БелаПАНу Ірына Леўшына і былы дырэктар Дзмітрый Наважылаў.
Іх абвінавачваюць паводле ч.2 арт.243 Крымінальнага кодэксу («Ухіленне ад сплаты падаткаў, якое пацягнула за сабой прычыненне шкоды ў буйным памеры»).
3 лістапада стала вядома, што ўлады абвясцілі экстрэмісцкім фармаваннем «Белсат».
МГ belsat.eu
