Авіякампанія «Iraqi Airways» з Іраку не будзе аднаўляць рэйсы ў Менск. Пра гэта на брыфінгу 12 лістапада паведаміла прадстаўніца прэс-службы Еўракамісіі Дана Спінан.
«Iraqi Airways» пацвердзіла, што не будуць аднаўляць палёты ў Менск», – заявіла яна.
Між тым амбасада Іраку ў Расеі абʼявіла аб арганізацыі вывазу ахвочых вярнуцца дадому іракцаў з Беларусі.
«Для ўключэння ў спіс на эвакуацыю просьба звяртацца па тэлефоне консульства: +79652673377 (WhatsApp) або па электроннай пошце кансулату: cons@iqemb.ru», – гаворыцца ў паведамленні.
Спінан таксама дадала, што «Turkish Airlines» прыпыняць продаж білетаў у Беларусь з Турцыі.
Раней паведамлялася, што авіякампанія «Turkish Airlines» не будзе прымаць на рэйсы да Менску сірыйцаў, іракцаў і еменцаў.
Аналагічнае рашэнне прыняла і дубайская авіякампанія «Emirates», піша PAP.
А «Белавія» заявіла, што «ў адпаведнасці з рашэннем кампетэнтных органаў Турэччыны з 12.11.2021 грамадзяне Іраку, Сірыі, Емена не будуць прымацца да перавозкі на рэйсах, якія ідуць з Турэччыны ў Беларусь».
МГ belsat.eu