Belsat.eu распавядае, што робяць улады Беларусі пасля таго, як Аляксандр Лукашэнка заявіў пра разгортванне рэгіянальнай групоўкі войска Беларусі і Расеі.
Падчас нарады з сілавікамі 10 кастрычніка Аляксандр Лукашэнка выступіў з рэзкімі абвінавачаннямі на адрас Украіны, заявіўшы, што афіцыйны Кіеў нібыта плануе нанясенне ўдараў па тэрыторыі Беларусі. Ён паведаміў, што ў сувязі з гэтым і «абвастрэннем на заходніх межах» было прынятае супольнае з Уладзімірам Пуціным рашэнне разгарнуць рэгіянальную групоўку войскаў Беларусі і Расеі. Лукашэнка таксама аддаў загад падрыхтавацца да прыёму і размяшчэння расейскіх вайскоўцаў, якіх будзе «не адна тысяча чалавек».
Хаця Лукашэнка сказаў, што фармаванне групоўкі «ідзе ўжо, па-мойму, цягам двух дзён», дагэтуль няма інфармацыі аб прыбыцці ў Беларусь новых расейскіх падраздзяленняў. Пра гэта пакуль не паведамляюць ні ўлады Беларусі, ні афіцыйны Кіеў, ні незалежныя медыі. Разам з тым ёсць звесткі пра перадачу Расеі танкаў Т-72 і іншай тэхнікі, што была на кансервацыі ў Беларусі. Паводле ўкраінскага камандавання, першая партыя беларускіх танкаў ужо накіраваная ў Белгародскую вобласць РФ.
Цікава, што былы кіраўнік Генштабу Беларусі, дэпутат Палаты прадстаўнікоў Алег Белаконеў заявіў 12 кастрычніка, што генеральныя штабы Беларусі і РФ зараз толькі «адпрацуюць склад» рэгіянальнай групоўкі, пасля чаго «пачнецца яе планавае стварэнне, калі вызначацца месцы разгортвання, задачы гэтай групоўкі, парадак матэрыяльна-тэхнічнага забеспячэння і гэтак далей».
«Мы павінны рэагаваць адэкватна і своечасова на ўсе рызыкі, выклікі і пагрозы, якія ўзнікаюць. Можа быць, вядома (і кіраўнік дзяржавы пра гэта гаварыў), яшчэ пункт кіпення не настаў. Але ў любым выпадку мы мусім дзейнічаць так, каб мы былі ў папераджальным стане», – заявіў Белаконеў.
Калі верыць словам Белаконева, атрымліваецца, што пакуль нават склад супольнай групоўкі і месца яе разгортвання ў Беларусі яшчэ не вызначаныя. Сябра Аб’яднанага кабінету Валерый Сахашчык, у сваю чаргу, лічыць, што на стварэнне супольнай групоўкі спатрэбіцца некалькі месяцаў.
Калі прыбыццё ў Беларусь новых расейскіх сілаў яшчэ не было зафіксавана, то ўзрастанне актыўнасці беларускіх вайскоўцаў адбылося ўжо на наступны дзень пасля нарады ў Лукашэнкі. 11 кастрычніка была абвешчана праверка Узброеных сілаў, падчас якой вайсковыя падраздзяленні будуць адпрацоўваць «пытанні прывядзення ў баявую гатовасць, здзяйсненне маршу, разгортванне ў прызначаных раёнах з выкананнем вучэбна-баявых задачаў».
Такія вучэнні – не новая з’ява для Беларусі. У пачатку траўня Мінабароны абвесціла раптоўную праверку сілаў рэагавання з абсалютна аналагічнымі задачамі: прывядзенне ў боегатовасць, марш, разгортванне і выкананне вучэбна-баявых задачаў. Тая праверка фактычна ператварылася ў няспынныя вучэнні і трэнаванні, з яўным акцэнтам на дзейнасці ў памежных з Украінай раёнах.
У чым розніца паміж травеньскімі і кастрычніцкімі вучэннямі – не зусім зразумела. Але цікава, што цяперашняя праверка праводзіцца на даручэнне Лукашэнкі дзяржаўным сакратарыятам Савету бяспекі, а не проста Міністэрствам абароны.
Увечары першага дня вучэнняў паведамлялася, што байцы 38-й Берасцейскай асобнай гвардзейскай дэсантна-штурмавой брыгады здзейснілі начное дэсантаванне на палігоне «Берасцейскі». Перасоўванне вайсковай тэхнікі таксама фіксавалася ў Берасці. На наступны дзень, 12 кастрычніка, Мінабароны распавяло, што вайсковыя падраздзяленні ўжо прыбылі ў прызначаныя раёны разгортвання і пачалі рыхтаваць рубяжы. У якія раёны былі перакінутыя беларускія падраздзяленні, не паведамляецца.
У памежным з Украінай Добрушскім раёне тым часам распачаліся «заняткі па мабілізацыйнай гатовасці» з удзелам органаў кіравання тэрытарыяльнай абароны і афіцэрамі-адстаўнікамі, паведамляе выданне «Флагшток». Мясцовыя ўлады сцвярджаюць, што заняткі планавыя і будуць праходзіць з 11 да 14 кастрычніка ва ўсёй Гомельшчыне.
Раней «Флагшток» звяртаў увагу на нетыповыя дзяржаўныя закупы ў некаторых памежных раёнах Гомельшчыны. Напрыклад, Брагінскі і Хойнікскі райвыканкамы закупляюць сотні мяшкоў для пакавання асабістых рэчаў вайсковаабавязаных. На думку выдання, гэта можа сведчыць аб рыхтаванні мабілізацыі. А Мазырскі памежны атрад закупляе таблічкі, на якіх адлюстроўваюцца падзеі, што адпавядаюць камандзе «Паветра» (напрыклад, мінанне мяжы замежнымі самалётамі і высадка дэсанту).
Адначасова з праверкай Узброеных сілаў зладзіла свае вучэнні і Міністэрства ўнутраных справаў. Як заяўляецца, падраздзяленні МУС і ўнутраных войскаў цяпер адпрацоўваюць барацьбу з дыверсантамі і незаконнымі ўзброенымі фармаваннямі.
Вучэнні былі арганізаваныя ў памежным Ельску Гомельскай вобласці. Паводле легенды, дыверсанты расстрэльваюць пост супрацоўнікаў ДАІ, забіраюць зброю, а потым яшчэ нападаюць на трактарыста. Пасля чаго МУС праводзіць «контртэрарыстычную аперацыю для лакалізацыі праціўніка». У роліку, апублікаваным МУС, ніхто не хавае, хто разглядаецца ў якасці патэнцыйнага ворага: «дыверсанты» носяць жоўтыя стужкі (так часта робяць байцы ЗСУ), а на шлеме аднаго з беларускіх сілавікоў можна пабачыць георгіеўскую стужку.
Тактычна-спецыяльныя вучэнні МУС на Гомельшчыне будуць працягвацца і ў наступныя дні. Першы намеснік міністра ўнутраных справаў Беларусі Юрый Назараў патлумачыў, што гэтыя захады звязаныя з тым, што «дэструктыўна настроеныя асобы, якія знаходзяцца за межамі краіны» заклікаюць да «падрыўной дзейнасці» і «актаў тэрарызму».
«У тым ліку ў рамках так званага плану «Перамога» акцэнтуецца ўвага на падрыхтоўцы ўзброеных фармаванняў, задачы якіх звязаны з прамой пагрозай нацыянальнай бяспецы», – падкрэсліў Назараў.
Легенда вучэнняў у Ельску пераклікаецца з заявай старшыні Камітэту дзяржбяспекі Івана Церцеля, якую ён зрабіў 12 кастрычніка ў інтэрв’ю тэлеканалу «Беларусь 1». Паводле Церцеля, замежныя спецслужбы нібыта падрыхтавалі ва Украіне «ад 100 да 300 баевікоў» для захопу райцэнтру ў Беларусі, які павінен стаць «плацдармам для далейшай наступальнай аперацыі». Баевікоў, як сцвярджае кіраўнік КДБ, таксама рыхтуюць у Польшчы і Літве – за гэтым нібыта стаіць ЦРУ і іншыя магутныя спецслужбы.
«Ёсць і іншыя сцэнары, – працягвае Церцель, – Яны прадугледжваюць у тым ліку падрыхтоўку да серыі тэрактаў на нашай тэрыторыі з улікам таго, што ў нас ствараецца супольная групоўка войскаў з Расейскай Федэрацыяй. Учыненне тэрактаў на чыгунцы, учыненне тэрактаў на шляху руху вайсковых фармаванняў нашых і нашых саюзнікаў».
Імаверна, КДБ цяпер у тым ліку рыхтуецца да аднаўлення акцыяў «рэйкавых партызанаў», якіх улады адразу ж абвесцілі «тэрарыстамі». Падкрэсліваецца, што «практыка стрымання тэрактаў з дапамогай агнястрэльнай зброі будзе працягнутая» – тут улады яўна намякаюць, што яны зноў гатовыя страляць на паражэнне па бяззбройных людзях.
На нарадзе 10 кастрычніка Лукашэнка аддаў загад сваім генералам правесці інфармацыйную працу з прадстаўнікамі буйных прадпрыемстваў і дзяржаўных органаў, каб асабіста патлумачыць ім ваенна-палітычную абстаноўку і цяперашнія захады ўлады. Паводле інфармацыі з адкрытых крыніцаў, асноўны мэсідж такіх сустрэчаў паўтарае галоўныя тэзісы дзяржаўнай прапаганды: Беларусь – у коле ворагаў, Захад і Украіна хочуць развязаць вайну, але панікаваць пакуль не трэба.
У Менску тур па прадпрыемствам узначалілі дзяржаўны сакратар Савету бяспекі Аляксандр Вальфовіч, міністр абароны Віктар Хрэнін, старшыня КДБ Іван Церцель і старшыня Дзяржаўнага памежнага камітэту Анатоль Лапо. 11 кастрычніка яны выступалі на МЗКЦ, 12 кастрычніка – на МАЗе і БелАЗе. Далей, як паведамляюць улады, у планах наведаць і іншыя «флагманы беларускай эканомікі».
Кіраўнікі сілавых ведамстваў выступаюць не толькі перад працаўнікамі прадпрыемстваў. Так, Вальфовіч, Хрэнін, Церцель і Лапо 11 кастрычніка правялі сустрэчу ў Доме афіцэраў з прадстаўнікамі органаў выканаўчай, заканадаўчай і судовай улады.
Вальфовіч, у прыватнасці, заявіў, што на Захадзе нібыта «пагаворваюць» пра нанясенне тактычных ядравых удараў па Беларусі. Цікава, што паводле ягоных словаў, «адной з нагодаў для выкарыстання вайсковай сілы супраць нашай краіны Захад лічыць магчымы ўваход ва Украіну новых расейскіх груповак з тэрыторыі Беларусі». Пры гэтым ён не ўдакладніў, ці сапраўды плануецца такі «ўваход».
Вальфовіч таксама казаў, што ЗША і ЕЗ «нарошчваюць падтрыманне дэструктыўных элементаў», а ва Украіне нібыта абмяркоўваецца ўдар па Беларусі сіламі палка імя Кастуся Каліноўскага.
Сакратар Савету бяспекі ў той жа дзень яшчэ паспеў выступіць перад байцамі 120-й асобнай гвардзейскай механізаванай брыгады. Там ён таксама казаў пра «спробы калектыўнага Захаду развязаць вайну ў Рэспубліцы Беларусь».
На мясцовым узроўні палітінфармацыю праводзяць сілавікі рангам ніжэй. На Мазырскім НПЗ 11 кастрычніка выступаў начальнік галоўнай вайсковай інспекцыі генерал-маёр Іван Багуслаўскі. Багуслаўскі казаў пра нарошчванне сілаў NATO, абвастрэнне сітуацыі ўздоўж беларускіх межаў і імавернасць узброеных правакацыяў.
Генералы, імаверна, дэманструюць на гэтых сустрэчаў адну і тую ж мультымедыя-прэзентацыю. У сюжэце мясцовага тэлебачання пра выступ Багуслаўскага ў аб’ектыў тэлекамеры трапілі некаторыя слайды гэтай прэзентацыі. Напрыклад, інструментамі «антыбеларускай кампаніі» Захаду там называліся «Белсат», радыё «Свабода», NEXTA, «МотольКО помоги», праваабарончыя арганізацыі «Freedom House» і «Беларускі дом», фонды Сораса, Маршала і Адэнаўэра і г. д.
У Гомлі чалец Савету Рэспублікі, начальнік гомельскай мытні Фелікс Яшкоў тлумачыў неабходнасць разгортвання рэгіянальнай групоўкі войскаў Беларусі і РФ на моладзевым форуме супрацоўнікаў мытных органаў. Ён агучваў там стары прапагандысцкі наратыў, што віна за вайну ва Украіне ляжыць на ёй самой, а ўкраінскае кіраўніцтва нельга лічыць самастойным, бо ўсе рашэнні нібыта прымаюцца ЗША і краінамі NATO.
У сюжэце ТРК «Гомель», прысвечанаму гэтаму форуму, сцвярджалася, што «ваенізаваныя фармаванні» Украіны нібыта пастаянна ладзяць правакацыі на мяжы. Пры гэтым ні аднаго прыкладаутакіх правакацыяў прапагандысты не прывялі.
Глеб Нержын belsat.eu