Ад 9 кастрычніка па ўсёй Беларусі дзейнічае абавязковы масачны рэжым для грамадскіх месцаў. «Белсат» паглядзеў на тое, як гэты масачны рэжым выконваюць улады, якія самі яго і ўвялі.
Аляксандр Лукашэнка 12 кастрычніка правёў нараду аб адукацыі з удзелам міністра адукацыі Ігара Карпенкі і іншых чыноўнікаў. На фота, якое апублікавала БелТА, не відаць ніводнага чалавека ў масцы, хоць чыноўнікі сядзяць плячо да пляча. На відэа адтуль таксама відаць, што ніхто з 18 прысутных чыноўнікаў не носіць маску.
На нядаўніх фота самога Міністэрства адукацыі з розных установаў масак не відаць.
Не ўсе насілі маскі і тады, калі старшыня Савету Рэспублікі Наталля Качанава расказвала пра каронавірус у Полацкім дзяржаўным універсітэце. Гэта было якраз 9 кастрычніка – у дзень увядзення масачнага рэжыму.
Некаторыя чыноўнікі то надзяваюць, то здымаюць маскі ў памяшканні: напрыклад, 11 кастрычніка ў прэс-цэнтры БелТА праводзілі прэс-канферэнцыю Дзяржаўнага камітэту стандартызацыі – на фота адтуль бачна, што тры з чатырох спікераў былі ў масках прынамсі частку канферэнцыі, але часам здымалі маскі.
Дэлегацыя Міністэрства працы ў Богушаўскім доме-інтэрнаце вытрымлівала масачны рэжым, але пры тым Мінпрацы публікавала і фота, на якіх бачна, што не ўсе супрацоўнікі Солтанаўскага псіханеўралагічнага дома-інтэрнату носяць маскі ў памяшканні і на вуліцы стаяць поплеч без масак.
Прадстаўнікі Міністэрства энергетыкі не насілі масак на сённяшнім адкрыцці выставы.
Сілавікі цяпер далёка не заўсёды носяць маскі, калі справа не тычыцца затрыманняў.
На фота Міністэрства абароны ў апошнія дні медычных масак не відаць – хіба процігазы.
АА belsat.eu
