Міністэрства працы Беларусі абвясціла аб чарговай індэксацыі мінімальнага заробку і прывязаных да яго выплатаў у сувязі з інфляцыяй. Мінулы раз такая індэксацыя была ў студзені.
Памер мінімальнага заробку павялічылі на 6,3 % да 417 рублёў і 86 капеек на месяц.
У пераліку на долары паводле курсу Нацбанку гэта $169,04. Ва ўсіх суседніх краінах мінімальны заробак вышэй. Напрыклад, у Расеі – $178,06, ва Украіне – $227,27.
Базавую стаўку і бюджэт пражытковага мінімуму не мянялі, бо іх пераглядаюць у жніўні, а тады інфляцыя не дасягнула бар’еру ў 5 %.
А на верасень інфляцыя дасягнула 6,3 % да студзеня (10,2 % у гадавым выражэнні), таму на той адсотак паднялі мінімальны заробак, які пераглядаюць у верасні. Выйшла плюс 17 рублёў і 86 капеек.
Зараз індэксаваць будуць выплаты, прывязаныя да мінімальнага заробку. Гэта выплаты па беспрацоўі, а таксама стыпендыі на час прафесійнай падрыхтоўкі ці падвышэння кваліфікацыі. Могуць індэксаваць і заробкі тых, у каго гэта прадугледжана калектыўнымі дамовамі.
АА belsat.eu
