У рэдакцыю «Белсата» звярнуўся глядач з Клімавічаў Магілёўскай вобласці, які распавёў, што там працаўнікоў дзяржаўных установаў, якія падпісваліся за альтэрнатыўных кандыдатаў на выбарах прэзідэнта Беларусі 2020, прымушаюць здымацца ў пакаяльных сюжэтах і казаць, што Бабарыка – злачынец.
Паводле суразмоўцы «Белсату» усё пачалося пасля падзеяў з Крысцінай Ціманоўскай, нарадзінкай Клімавічаў.
4 жніўня стала вядома, што звальняюць дырэктара адной з установаў адукацыі, але прадпасылак да таго не было. Праз некалькі дзён высветлілася, што такая ж сітуацыя яшчэ ў адной навучальнай установе, а тых працаўнікоў, якія падчас перадвыбарчай кампаніі аддавалі свае подпісы за Віктара Бабарыку, пад пагрозай звальнення вымушаюць напісаць пакаяльны ліст і запісаць відэа, маўляў «мы памыліліся, ставячы подпіс за вылучэнне Бабарыкі ў кандыдаты і не ведалі пра тое, што ён апынецца злачынцам, мы цалкам падтрымліваем палітыку Лукашэнкі».
Па словах суразмоўцы, такая сітуацыя пачала паўтарацца ў іншых клімавіцкіх бюджэтных арганізацыях, а здымкамі займаецца мясцовая тэлекампанія «Мір ТВ». Людзей запэўніваюць, што відэа не будзе нідзе распаўсюджвацца.
Журналісты «Белсату» некалькі дзён запар спрабавалі звязацца з супрацоўнікаў «Мір ТВ», але кантактныя тэлефоны мясцовай тэлекампаніі не адказваюць.
АА belsat.eu