На новай працы Марыі прозвішчы 588 беларускіх жанчын, што зазналі крымінальны пераслед пасля жнівеньскіх пратэстаў. Але гэты спіс далёка няпоўны.
«Нагодай, каб зрабіць жаночы сцяг стала другая гадавіна жаночага маршу на Камароўцы, тады гэта было стыхійна і кранальна. Пачыналася з двух дзясяткаў жанчын, а перарасло ўсё ў вялікія маршы. Іх было так шмат, бо немагчыма было цярпець гэты гвалт і беззаконне, гэта чорнае пекла. Тады жанчыны выйшлі супраць гэтага гвалту. На першых маршах не было затрыманняў, пакуль улады не зразумелі, што жанчыны для іх таксама небяспечныя», – кажа ў размове з «Белсатам» Марыя Грыц.
На думку журналісткі за апошнія два гады значэнне жанчын у пратэсце абясцэньваецца, а на першы план зноў выходзяць мужчыны.
«Калі два гады таму ўсе былі ў захапленні ад беларускіх жанчын, жаночым было ўвасабленне пратэстаў, замежныя СМІ пісалі, якія неверагодныя ў Беларусі дзяўчаты, то цяпер гэта нівеліравалася, і знікла, зноў мужчыны гавораць з мужчынамі, прадстаўніцтва мужчынаў паўсюль, а тым часам уклад жанчын нікуды не дзеўся. Жанчына церпяць ад крымінальнага пераследу. Канешне, іх не столькі як мужчын, але такая праблема ёсць, і я палічыла важным яе абазначыць», – распавядае журналістка.
Нагадаем, што гэта другая падобная праца Марыі, раней яна зрабіла Бел-чырвона-белы сцяг з прозвішчамі беларускіх палітвязняў. На ім ад рукі яна напісала імёны ўсіх беларускіх палітвязняў, якія зазналі палітычны пераслед з 1996 года.
Пазней, каб падтрымка набыла рэальную вагу, Марыя вырашыла выставіць сцяг на дабрачынны аўкцыён, а сродкі ад яго продажу накіраваць сем’ям беларускіх палітвязняў. Сцяг прадалі на онлайн-аўкцыёне «eBay» за 1125 долараў. Грошы пайшлі на дапамогу палітвязням, а сцяг апынуўся ў музеі Вольнай Беларусі ў Варшаве.
МХ belsat.eu