Гарадзенскі абласны суд прызнаў былога начальніка часткі МНС Аляксандра Курганскага вінаватым па двух артыкулах Крымінальнага кодэксу. Прычынай затрымання мужчыны стаў лайк пад пастом, які «апісвае падзеі ў кватэры забітага супрацоўнікамі КДБ Андрэя Зельцара», паведамляюць праваабаронцы.
Крымінальную справу разглядаў суддзя Аляксандр Казёл. Аляксандра Курганскага прызналі вінаватым па арт. 369 КК РБ («Абраза прадстаўніка ўлады») і 130 КК РБ («Распальванне расавай, нацыянальнай, рэлігійнай або іншай сацыяльнай варожасці або варожасці»).
Дзяржаўны абвінаваўца запытваў для Аляксандра 4 гады калоніі, аднак суддзя вырашыў пакараць Курганскага 1 годам і 6 месяцамі пазбаўлення волі ва ўмовах агульнага рэжыму, а таксама штрафам у 50 базавых велічыняў (1600 рублёў).
У чэрвені КДБ унёс Аляксандра ў спіс асоб, «датычных да тэрарыстычнай дзейнасці».
Аляксандр Курганскі – былы камандзір часці МНС № 7 у Горадні. Ён праслужыў у МНС больш за 15 гадоў. Прызнаны праваабаронцамі палітычным зняволеным.
Алена Рувіна belsat.eu