Кліенты ЗАТ «МТБанк» атрымалі паведамленне пра тое, што кампанія далучае да сябе «Ідэя Банк». Рэарганізацыю плануюць заверыць да 31 кастрычніка 2021 года.
У выніку «МТБанк» стане правапераемнікам «Ідэі» адносна ўсіх крэдытаў і запазычанасцяў. Патрабаванні крэдытораў у сувязі з рэарганізацыяй можна падаваць у «МТБанк» цягам бліжэйшых 30 дзён.
Падрабязныя адказы на пытанні апублікавалі на сайце «Ідэі». Грошы на рахунках не знікнуць, рахункі перааформяць у «МТБанку» аўтаматычна. Умовы дэпазітаў не зменяцца. Перазаключаць дамовы на крэдыты не трэба.
Функцыянал банкаўскіх картак «Ідэі» абмяжуюць ужо з 1 кастрычніка, кліентам створаць віртуальныя карткі «МТБанку». Але кліентам раяць хутчэй, да 24 верасня, перааформіць картку ў «МТБанку», бо на карткі «Ідэі» ўжо ў кастрычніку не змогуць, напрыклад, налічыць заробак.
«МТБанк», якім валодала сямʼя набліжанага да Аляксандра Лукашэнкі алігарха Аляксея Алексіна («Энерга-Оіл», «Табакеркі»), у лютым дамовіўся пра набыццё «Ідэя Банку» ў польскай кампаніі «Getin Holdings» за 50 мільёнаў беларускіх рублёў.
Аднак сям’я Алексіных у чэрвені прадала 100 % акцыяў холдынгу, які валодае «МТБанкам», кампаніі «Stoneva Limited» бізнесоўца Рамэа Абдо, якому належаць гандлёва-забаўляльны цэнтр «Galileo», бізнес-цэнтры «Rubin Plaza» і «Silver Tower». Абдо набыў і «Ідэя Банк». Алексін трапіў пад санкцыі Еўразвязу 21 чэрвеня.
АА belsat.eu