Літва спыніць транзіт беларускага калію, Мікалаю Статкевічу – 65. Галоўнае за 12 жніўня
Belsat.eu падводзіць вынікі 12 жніўня – 369-га дня супрацьстаяння грамадства і ўладаў.
Са снежня Літва спыніць транзіт беларускага калію
Міністр транспарту Літвы Марус Скуодзіс рапавёў парталу 15min.lt, што са снежня, калі набудуць моц санкцыі ЗША, праз Літву перастануць перавозіць прадукцыю «Беларуськалію».
Гэтая прадукцыя – траціна грузаў, якія ідуць праз літоўскую чыгунку і порт Клайпеды. Толькі 10 % беларускіх угнаенняў ідзе ў Еўразвяз (астатняе – у Кітай, Індыю, Бразілію і іншыя краіны). Калі тая ж чыгунка працягне вазіць угнаенні, яе могуць пакараць банкі.
«З аднаго боку, мы можам сказаць, што санкцыі тычацца толькі амерыканскіх кампаніяў, але з практыкі мы ведаем, што банкі не будуць прымаць плацяжы за паслугі, якія аказваюцца ў Літве, у еўра, а не толькі ў доларах. Кампаніі, калі ёсць суб’ект, які трапіў пад санкцыі, адмаўляюцца мець з ім якія-небудзь бізнесовыя адносіны, пазбягаючы рызыкі», – растлумачыў міністр.
На думку Скуодзіса, яшчэ да снежня перавозкі скароцяцца, бо многія кампаніі не захочуць мець справы з падсанкцыйнай кампаніяй.
Адмова ад абслугоўвання «Беларуськалію» будзе каштаваць Літве адчувальных фінансавых стратаў. Чыгунцы можа спатрэбіцца дапамога ўраду – патэнцыйныя страты ацэньваюць у 20 млн еўра. Скуодзіс у сувязі з гэтым нагадаў пра надзвычайнае становішча на мяды – Літва вінаваціць у арганізацыі хвалі нелегальнай міграцыі рэжым Аляксандра Лукашэнкі.
Аляксея Кудзіна прызналі палітвязнем
Праваабарончыя арганізацыі Беларусі выступілі з супольнай заявай, у якой прызналі баксёра Аляксея Кудзіна і прадпрымальніка Андрэя Сакалоўскага палітычнымі зняволенымі, паведамляе праваабарончы цэнтр «Вясна».
Баксёра Аляксея Кудзіна прызналі вінаватым паводле ч. 2 арт. 363 КК («Супраціў працаўніку органаў унутраных спраў або іншай асобе, якая ахоўвае грамадскі парадак, спалучаны з ужываннем гвалту або з пагрозай яго прымянення»). Яму прысудзілі 2,5 года калоніі.
Андрэй Сакалоўскага асудзілі на 3 гады калоніі. Яго абвінавацілі і прызналі вінаватым у тым, што ён стаяў у счэпцы і не толькі аказваў супраціў амапаўцам, але і меў намер прычыніць боль 11 пацярпелым амапаўцам.
Праваабаронцы патрабуюць вызвалення ўсіх палітычных вязняў і спынення тэрору супраць грамадзянаў краіны.
У Беларусі цяпер 631 палітычны вязень.
Фядуце працягнулі тэрмін утрымання пад вартай
Публіцысту і палітолагу Аляксандру Фядуце працягнулі тэрмін утрымання пад вартай да 12 кастрычніка. Пры гэтым следчыя дзеянні над вязнем не праводзіліся ўжо тры месяцы, паведамляе ў сваім Facebook жонка палітвязня Марына Шыбко.
Ужо амаль 4 месяцы Аляксандр Фядута за кратамі. Яго ўтрымліваюць у СІЗА КДБ. Абвінавачваюць палітолага ў дзяржаўным перавароце.
Затрымалі і вызвалілі Дзмітрыева
Раніцай 12 жніўня сілавікі затрымалі кандыдата на прэзідэнцтва на выбарах 2020 года Андрэя Дзмітрыева. Прычыны затрымання невядомыя.
Тое, што Андрэя Дзмітрыева затрымалі, парталу TUT.by пацвердзіла ягоная паплечніца Таццяна Караткевіч – кандыдатка на прэзідэнцтва на выбарах 2015 года.
Андрэй Дзмітрыеў, сярод іншага, – дэлегат «Сходу» – платформы-альтэрнатывы Усебеларускаму сходу Аляксандра Лукашэнкі. Дэлегатаў платформы масава затрымвалі 11 жніўня. З трох дзясяткаў затрыманых учора каля 20 чалавек вызвалілі, ва ўсіх праводзілі ператрусы.
Вечарам стала вядома, што пасля допыту палітыка вызвалілі і ён дома. Што стала прычынаю затрымання і хто ладзіў допыт – пакуль не агучваецца.
Андрэеву, Барысевіч, Лубнеўскую і Чульцову ўганаравалі прэміяй
Нямецкі фонд «ZEIT-Stiftung» і нарвежскі фонд «Fritt Ord» 12 жніўня назвалі лаўрэатаў прэміі «Свабодныя медыі» («Free Media Awards»).
Гэта Беларуская асацыяцыя журналістаў, а таксама асуджаныя на два гады зняволення за рэпартаж журналісткі «Белсату» Кацярына Андрэева і Дар’я Чульцова, параненая сілавікамі на пратэстах-2020 журналістка «Нашай нівы» Наталля Лубнеўская і журналістка TUT.by Кацярына Барысевіч, якая была ў зняволенні паўгода, бо абвергла сцверджанне ўладаў Беларусі, што забіты з удзелам сілавікоў Раман Бандарэнка быў п’яны.
Журналістак узнагародзілі за «адвагу ў расследаванні, асвятленні і дакументаванні палітычнага крызісу ў Беларусі». Прэміяй адзначаюць «беспрэцэдэнтныя высілкі і адвагу цягам гэтага драматычнага года, працу ва ўмовах дыктатуры».
Міколу Статкевічу 65!
Палітык Мікола Статкевіч сустракае дзень народзінаў у Гомельскім СІЗА. Сёння яму споўнілася 65 гадоў. Узгадваем апошнія акцыі Статкевіча, які да апошняга заставаўся адным з самых рашучых вулічных палітыкаў.
Амбасадарка ЗША ў Беларусі працягне працу
Афіцыйны Менск адклікаў згоду на прызначэнне Джулі Фішэр амбасадаркай Злучаных Штатаў. Але дыпламат працягне працу дзеля падтрымання беларускага народу.
На брыфінгу вечарам 11 жніўня кіраўнік прэс-службы Дзяржаўнага дэпартаменту ЗША Нэд Прайс паведаміў, што Джулі Фішэр і персанал амбасады ў Менску «працягнуць падтрымліваць дэмакратычныя памкненні беларусаў».
«Адказнасць за пагаршэнне стасункаў між ЗША і Беларуссю ляжыць на рэжыме – на яго няздольнасці дазволіць незалежным галасам прагучаць у Беларусі і яго нежаданні выконваць міжнародныя абавязкі», – мяркуе Дзяржаўны дэпартамент ЗША.
СК belsat.eu
