Працэс у «справе студэнтаў» 12 ліпеня працягнуўся са спрэчкі бакоў. Сёння абвінавачаныя маюць выступіць з апошнімі словамі. «Белсат» перадае, што казалі іхныя адвакаты.
Са словаў адвакаткі, ейную падабаронную абвінавачваюць у вельмі сур‘ёзным дзеянні без істотных доказаў, а следства падагнала абвінавачанне пад матэрыялы справы ўжо пасля затрымання і так званай «яўкі з павіннай».
Ні з кім, акрамя Іллі Трахтэнберга, з якім Таццяна Якельчык вучыцца на адным факультэце, абвінавачаная не была знаёмая. У Zoom-канферэнцыях не ўдзельнічала, адпаведна, заклікаць да дзеянняў, якія груба парушаюць грамадскі парадак, не магла.
Таксама Таццяне ставяць у віну ідэалагічную варожасць, аднак абарона лічыць такое абвінавачанне беспадстаўным, больш за тое, яно «цягне на міністра, але ніяк не на студэнтку другога курсу».
Адвакат просіць апраўдаць Таццяну.
Адвакатка кажа, што «выстаўленае абвінавачанне складана разабраць нават юрысту, не тое што падсуднай».
У Telegram абвінавачаная была падпісаная ўласным імем і прозвішчам, адпаведна, яна не спрабавала схаваць сваю асобу. Ніхто з іншых фігурантаў справы не ведае, каб Алана Гебрэмарыям кагосьці заклікала да ўдзелу ў акцыях.
Адвакатка падкрэслівае, што студэнты выступалі супраць гвалту і парушэння законаў, але ўгледзець тут намер дзеянняў, якія груба парушаюць грамадскі парадак, немагчыма. Ёй шкада, што гэтыя маладыя людзі вымушаныя заставацца ўжо так доўга пад вартаю, а яны ж маглі б быць добрымі спецыялістамі. Абаронца лічыць абвінавачанне неабгрунтаваным і просіць апраўдаць сваю падабаронную.
Ксенія Сырамалот не прызнала віну, бо нічога з прадпісанага абвінавачаннем не здзяйсняла.
Адвакат удакладняе, што ў матэрыяле справы адсутнічаюць доказы віны падабароннай і папярэдняй змовы, усе абвінавачанні расплывістыя і галаслоўныя. Глеб Фіцнер, які адзіны з 12 фігурантаў справы прызнаў віну, таксама не згадваў што-небудзь аб супольным плане.
Абарона адзначае, што заняткі падчас акцыяў, якія праходзілі на вялікім перапынку, сарваныя не былі, праход быў вольны, таму просіць апраўдаць сваю падабаронную.
Адвакат Вікторыі Гранкоўскай цалкам падтрымлівае сваіх калегаў і лічыць абвінавачанне абагульненым: яно не мае пацверджанняў. Просіць прызнаць Вікторыю невінаватай і апраўдаць.
Праца ўніверсітэту парушаная не была, заняткі не прыпыняліся. Звесткі з асабістых ліставанняў Вікторыі не павінны мець юрыдычнай сілы, бо былі атрыманыя без згоды абвінавачанай.
Спрэчкі бакоў скончаныя, у судзе абвешчаны перапынак да 14:30, дзе пасля абвінавачаныя выступяць з апошнімі словамі.
КА belsat.eu