Федэрацыя прафсаюзаў Беларусі змагаецца з высокімі цэнамі на беларускую агародніну. Як заявіў у эфіры АНТ намеснік старшыні ФПБ Уладзімір Пазнякоў, аптавікі купляюць у фермераў агуркі і памідоры за бесцань, а цана на іх у крамах «вельмі высокая».
«Закупная цана на ўзроўні 50–60 капеек. Але праз ланцужок пасярэднікаў, дасягаючы паліцы крамаў, мы бачым цану ад 2,5 да 2,7 рубля за той жа агурок», – заявіў ён.
Паводле яго, у менскіх крамах ёсць капуста з Казахстану па 3,8–3,9 рубля, тады як у Альшанах закупная цана на яе 1,2 рубля.
«Такія моманты неабходна выкараняць. І будуць зробленыя відавочныя намаганні, каб дэталёвым чынам прасачыць ланцужок цэнаўтварэння і паведаміць пра гэта рэгулятару», – заявіў намеснік старшыні ФПБ.
Пры гэтым праблема палягае ў тым ліку ў заканадаўстве, бо прыватныя падворкі не маюць права працаваць паводле дамоваў з гандлёвымі сеткамі, а апошнія самі не забяспечваюць закупаў. Каб закупляць прадукцыю ў насельніцтва, мясцовыя ўлады распрацавалі інвестыцыйны праект будаўніцтва ў Альшанах гандлёва-лагістычнага цэнтру, але грошай на яго няма.
У траўні афіцыйная гадавая інфляцыя ў Беларусі склала 17 %. Прадукты ж за год выраслі ў цане на 19,3 %.
Якуб Хруст belsat.eu