Прэзідэнт Фінляндыі Саўлі Нійністэ заявіў, што яго краіна не будзе далучацца да блоку NATO асобна ад Швецыі, паведамляе NRK. Краіны разам падалі заяўку на сяброўства ў Альянсе, аднак праз супярэчнасці з Турэччынай, пашырэнне блоку пад пытаннем.
Пра гэта Нійністэ заявіў у нядзелю падчас сумеснай прэс-канферэнцыі з генеральным сакратаром Альянсу Енсам Стольтэнбэргам.
«Я скажу, што выпадак Швецыі – гэта наш выпадак. Гэта значыць, што мы будзем ісці далей разам», – сказаў прэзідэнт Фінляндыі.
Ён таксама адзначыў, што прэтэнзіі Турэччыны да Фінляндыі і Швецыі наконт нібы падтрымкі тэрарыстаў яго здзівілі.
«Нас здзівіла пазіцыя Турэччыны, але ў міжнароднай палітыцы мы павінны сур’ёзна ставіцца да таго, што гаворыць іншы бок. Так мы і будзем рабіць. Я спадзяюся, мы знойдзем рашэнне, якое ўсіх задавальняе», – дадаў Нійністэ.
Напярэдадні паведамлялася, што Фінляндыя адмовілася выконваць умовы Анкары для далучэння да NATO. Турэччына накіравала запыт экстрадаваць людзей, якіх турэцкі ўрад абвінавачвае ў сувязях з тэрарыстамі.
Раман Лугоўскі belsat.eu
