У Маскве рэзка пракаментавалі намер Фінляндыі далучыцца да NATO. Расейскі бок паабяцаў зрабіць крокі ў адказ ваенна-тэхнічнага і іншага характару.
12 траўня прэзідэнт Фінляндыі Саўлі Нійністэ і прэм’ер-міністарка Санна Марын выступілі з супольнай заявай аб неадкладным уступленні ў NATO. Раней Фінляндыя захоўвала нейтралітэт, але пасля поўнамаштабнай агрэсіі Расеі супраць Украіны пазіцыя кіраўніцтва краіны змянілася. «Мы не можам заставацца безабароннымі перад Расеяй, якая не выконвае міжнародных законаў», – заявіла фінляндская прэм’ер-міністарка.
Прэс-сакратар Крамля Дзмітрый Пяскоў падкрэсліў, што далучэнне Фінляндыі да NATO «безумоўна пагражае бяспецы Расеі».
У МЗС РФ заявілі, што далучэнне Фінляндыі да NATO нанясе сурʼёзную шкоду двухбаковым расейска-фінляндскім стасункам, падтрыманню стабільнасці і бяспекі ў паўночнаеўрапейскім рэгіёне.
«Расея будзе вымушаная зрабіць крокі ў адказ як ваенна-тэхнічнага, гэтак і іншага характару ў мэтах купіравання пагрозаў яе нацыянальнай бяспецы, якія ў сувязі з гэтым узнікаюць», – заявілі ў МЗС.
Масква нагадвае Фінляндыі аб адказнасці і наступствах далучэння да NATO, а таксама абяцае «рэагаваць паводле сітуацыі».
РР belsat.eu
