16 чэрвеня адбудзецца дабрачынны анлайн-канцэрт «World Unite for Ukraine». Музычны марафон будуць трансляваць у больш чым 25 краінах свету. У ім возьме ўдзел гурт «Pink Floyd» і іншыя выканаўцы, а таксама вядомыя акторы, спартоўцы і іншыя знакамітасці з Канады, Еўропы, Ізраілю і ЗША. Мэта канцэрта – сабраць 10 мільёнаў долараў дапамогі для Украіны.
Сабраныя сродкі перададуць для дапамогі ўкраінцам, якія былі вымушаныя пакінуць свае дамы праз уварванне Расеі ва Украіну.
Трансляцыя канцэрта будзе ісці на сайце «Mandolin», а запіс падзеі будзе даступны на працягу мінімум 24 гадзін пасля яго. Гледачы атрымаюць доступ да трансляцыі пасля таго, як абяруць той ці іншы памер ахвяравання, якое і будзе платай за квіток. Мінімальны ўнёсак – 30 долараў.
Нагадаем, што ў мінулым месяцы «Pink Floyd» зноў аб’ядналіся, каб падтрымаць народ Украіны сваёй першай новай музычнай кампазіцыяй упершыню за амаль 30 гадоў. У «Hey Hey Rise Up» да Дэвіда Гілмара і Ніка Мэйсана далучыліся даўні басіст «Pink Floyd» Гай Прэт і Ніцін Соні на клавішных. Твор таксама быў адметны праз незвычайнае вакальнае выкананне Андрэя Хлыўнюка з украінскага гурта «Бумбокс».
ЗХ belsat.eu