Палата прадстаўнікоў падтрымала праект закону аб завочных судах над апанентамі рэжыму

У Беларусі плануюць увесці інстытут «спецыяльнага вядзення», каб судзіць людзей, якія застаюцца за межамі краіны.

Адпаведныя папраўкі ў Крымінальна-працэсуальны кодэкс прыняла ў першым чытанні Палата прадстаўнікоў.

У праекце закону выкладзены парадак дасудовага вядзення і судовага разгляду крымінальных справаў супраць абвінавачванага, які перабывае па-за межамі Беларусі.

Ён будзе пашырацца на справы паводле артыкулаў аб злачынствах:

• супраць міру і бяспекі чалавецтва;
• супраць дзяржавы;
• шэрагу іншых злачынстваў, што прыводзяць да пагрозы нацыянальнай бяспецы.

Праектам прадугледжана, што вядзенне крымінальнай справы магчымае, калі абвінавачваны ўхіляецца ад яўкі ў следчы орган, у ягонай выдачы адмоўлена або цягам шасці месяцаў не атрыманы адказ на запыт аб выдачы.

Таксама прадугледжваецца правядзенне спецыяльнага вядзення без запыту аб выдачы: пастанову на гэта можа выдаць генеральны пракурор, а таксама старшыня Следчага камітэту і старшыня КДБ са згоды генеральнага пракурора.

Ініцыятыва праводзіць суды над палітэмігрантамі завочна ўпершыню была агучана сілавікамі ў лістападзе 2021 года.

РР belsat.eu