«Белсат» падводзіць вынікі апошніх содняў поўнамаштабнай вайны, якую распачала Расея ва Украіне. Пра галоўныя падзеі на вечар 12 красавіка чытайце ў нашым аглядзе.
У Офісе генеральнага пракурора Украіны паведамілі, што з пачатку вайны ва Украіне загінулі 186 дзяцей. Больш за 344 атрымалі раненні рознай ступені цяжкасці. Агулам, паводле ўстановы, пацярпелі больш за 530 дзяцей. Таксама ў выніку бамбаванняў і абстрэлаў расейскімі ўзброенымі сіламі разбураныя 938 навучальных установаў, 87 з іх былі знішчаныя цалкам.
У гэты ж час Генеральны штаб ЗСУ назваў свежыя лічбы стратаў асабовага складу расейцаў з пачатку вайны: цяпер гэта каля 19,6 тысячы чалавек.
Начальнік украінскай выведкі Кірыл Буданаў заявіў, што Расея плануе тэракты на ўласнай тэрыторыі, каб абвінаваціць у іх Украіну. Паводле яго, гэтыя тэракты будуць пададзеныя як помста ўкраінцаў за Бучу і Краматорск, а таксама як апраўданне жорсткасці да цывільнага насельніцтва Украіны.
Упаўнаважаная Вярхоўнай Рады Украіны ў справе правоў чалавека Людміла Дэнісава заявіла, што ўжо задакументаваныя некалькі выпадкаў згвалтаванняў у Бучы. З ейных словаў, расейскія вайскоўцы падчас акупацыі гораду рэгулярна гвалтавалі каля 25 дзяўчат і жанчын векам ад 14 да 24 гадоў, якіх змясцілі ў сутарэнне аднаго з дамоў. Дзевяць з іх цяпер цяжарныя. Генеральная пракуратура Украіны пачала расследаванне.
Полк «Азоў» паведаміў у Telegram, што ўвечары 11 красавіка ў Марыупалі расейскія войскі выкарысталі супраць украінцаў невядомае атрутнае рэчыва. Яго скінулі з беспілотніка. У пацярпелых назіраюцца дыхальная няздатнасць і вестыбула-атактычны сіндром.
Брытанская вайсковая выведка паведаміла, што расейскія войскі, якія пакідаюць тэрыторыю Беларусі, будуць пераведзеныя на ўсход Украіны. У ведамстве зазначаюць, што цягам двух-трох тыдняў чакаецца ўзмацненне баёў на Данбасе.
Разам з тым намеснік Генеральнага сакратара NATO Мірча Джоанэ выказаў меркаванне, што другі этап вайны ва Украіне непазбежны і будзе больш маштабны ды крывавы.
У Расеі затрымалі былога дарадцу Уладзіміра Пуціна Уладзіслава Суркова. Гэта можа быць наступствам чыстак у расейскіх спецслужбах, якія правалілі стварэнне «пятай калоны» ва Украіне. Нагадаем, што Суркоў быў адным з ідэолагаў праекту «Новороссия» і куратарам украінскага кірунку працы Крамля.
Акрамя гэтага, паведамляюць, што ў расейскім ФСБ пачаліся чысткі. Імаверная прычына – некарэктныя звесткі пра сітуацыю ва Украіне напярэдадні ўварвання, следствам чаго стаўся поўны правал пуцінскага бліцкрыгу. Паводле папярэдніх звестак, ад працы адхіленыя ўжо каля 150 супрацоўнікаў спецслужбы, а кіраўніка аддзелу вонкавай выведкі ФСБ РФ Сяргея Бяседу ўзялі пад варту.
Выданне «Флагшток» паведаміла, што на тэрыторыю РНПЦ Гомля прывезлі параненых расейскіх вайскоўцаў з прыкметамі радыяцыйнага апраменьвання. Паводле крыніцы, на гэты момант у РНПЦ застаюцца 22 вайскоўцы РФ. Як мінімум два маюць сімптомы радыяцыйнага апраменьвання. Яны цяпер на спецыялізаваным абследаванні. Імаверна, што гэта тыя жаўнеры, якія «рылі акопы» ў Рудым лесе каля Чарнобыльскай АЭС.
ВК belsat.eu
