Затрымалі былога сілавіка, галоўнага спецыяліста «Белаграпрамбанку» Алега Ермакова
Байцы ГУБАЗіК пахваліліся ў Telegram затрыманнем былога старшага памочніка пракурора Маскоўскага раёну Менску.
Затрыманы Алег Ермакоў на відэа сілавікоў расказвае, што праходзіў службу з 2011 года па 2019-ы, але назва ведамства «зацэнзураваная». Ды «Медыязона» адшукала згадку пра яго на сайце адміністрацыі Маскоўскага раёну Менску: ён быў старшым памочнікам пракурора раёну. Цяпер Ермакоў працуе галоўным спецыялістам дзяржаўнага «Белаграпрамбанку».
Мужчыну затрымалі нібыта за «зліў персанальных звестак» у Telegram-канал «Nexta». Яму пры тым закідаюць зусім іншы артыкул: ч.1 арт. 130 КК РБ – «Распальванне варожасці».
Сілавыя ведамствы практычна штодзень паведамляюць пра чарговыя палітычныя затрыманні, у Telegram-каналах абражаюць затрыманых і здзекуюцца з іх затрымання, а з нядаўняга часу пачалі пісаць, што «перакрэсліваюць» людзей.
АА belsat.eu
