Выводзіць міратворцаў АДКБ з Казахстану будуць паэтапна і распачнуць праз два дні. Пра гэта паведаміў Касым-Жамарт Такаеў на паседжанні парламенту, піша Zerkalo.io.
Такаеў падкрэсліў, што асноўная місія міратворцаў АДКБ паспяхова завершаная. Чакаецца, што вывад войскаў з Казахстану зойме не больш за 10 дзён.
6 студзеня на фоне масавых пратэстаў прэзідэнт Казахстану Касым-Жамарт Такаеў папрасіў кіраўнікоў дзяржаваў АДКБ паспрыяць пераадоленню «тэрарыстычнай пагрозы». Рада АДКБ прыняла рашэнне накіраваць у Казахстан міратворчыя сілы, у склад якіх увайшлі вайскоўцы Расеі, Беларусі, Арменіі, Таджыкістану і Кыргызстану.
З Беларусі ў Казахстан паляцела міратворчая рота са складу 103 паветрана-дэсантнай брыгады ССА. Паводле афіцыйных паведамленняў, беларускія вайскоўцы ахоўваюць ваенныя, дзяржаўныя і сацыяльна значныя аб’екты ў Алматы і прылеглых раёнах, у тым ліку, ваенны аэрадром «Жетыген».
ГГ, belsat.eu
