Субота, 5 снежня, стала ў Беларусі 119-м днём з пачатку штодзённых паслявыбарных пратэстаў. Узгадваем падзеі сённяшняга дня.
Яшчэ напярэдадні нядзелі жыхары беларускіх гарадоў выйшлі ўдзень і ўночы 5 снежня на акцыі пратэсту і салідарнасці.
Гэтак, у Горадні выйшаў на суботні марш мікрараён Альшанка.
А ў Менску шпацырам па сваім мікрараёне прайшліся жыхары Сухарава
Зладзілі акцыю і ў квартале «Вікторыя».
Прайшліся маршам і ў Наваполацку.
Больш дробныя акцыі адбыліся і ў іншых мясцінах.
Свае мерапрыемствы зладзілі і прыхільнікі ўладаў. У Менску яны прайшліся невялікім маршам па праспекце Незалежнасці.
А на месцы былога канцлагера ў Трасцянцы растапталі бел-чырвона-белы сцяг.
Нарвежская кампанія Yara, якая з’яўляецца адным з галоўных партнёраў «Беларуськалію», зноў выступіла з асуджэннем гвалту ў Беларусі ды рэпрэсіямі супраць працаўнікоў прадпрыемства. Пра гэта было заяўлена ў тым ліку беларускаму амбасадару ў Швецыі ды Нарвегіі Дзмітрыю Мірончыку.
Працягваецца эканамічны пратэст і ў Беларусі. Гэтак, за 11 месяцаў бягучага года выдалі 674 568 дазволаў на допуск транспартных сродкаў да ўдзелу ў дарожным руху, што на 36,8% менш за аналагічны паказнік за студзень–лістапад 2019 года (1 066 548).
Між тым рэпрэсіі ў Беларусі працягваюцца. Гэтак, у Следчы камітэт выклікалі ўсіх, 20, працаўнікоў «Нашай Нівы», а ў Наваполацку затрымалі каля 30-і ўдзельнікаў мясцовага варыянту «Мазгабойні».
Паводле звестак Міністэрства аховы здароўя, за суткі ў Беларусі зарэгістравана 1896 пацыентаў з COVID-19. Гэта новы рэкорд.
Між тым сацыёлагі ды лекары мяркуюць, што лічбы нашмат большыя.
На Гарадзеншчыне між тым паліклінікі і амбулаторыі часова прыпыняюць аказанне планавай медычнай дапамогі. Напярэдадні падобнае ж рашэнне прынялі ў Менску.
Між тым «Народнае апытанне» даведалася, колькі людзей у Беларусі маглі перахварэць на COVID-19. На 18 лістапада хворымі на COVID-19 маглі быць 8,4% дарослага насельніцтва – каля 635 тыс. чалавек. Калі ўлічваць тых, хто мяркуе, што хварэў, але не меў афіцыйнага дыягназу, то найбольш імаверная лічба – 1.9 млн чалавек.
МГ belsat.eu
Напішы журналісту ліст
Тры беларускія журналісткі ўтрымліваюцца цяпер за кратамі і маюць абвінавачванні паводле крымінальных артыкулаў: Кацярына Андрэева («Белсат»), Дарʼя Чульцова («Белсат»), Кацярына Барысевіч (TUT.BY).
Адным з моцных спосабаў падтрымаць дзеўчын можа стаць ваш ліст да іх.
Куды пісаць:
Кацярына Андрэева (Бахвалава): 222160 г. Жодзіна, вул. Савецкая, д. 22а.
Дарʼя Чульцова: 222160 г. Жодзіна, вул. Савецкая, д. 22а.
Кацярына Барысевіч: СІЗА № 1, 220030 г. Менск, вул. Валадарскага, д. 2.
Не забудзьцеся ўкласці ў ліст пусты канверт, каб дзеўчыны маглі вам адказаць. Дзякуем за вашую неабыякавасць!