Міжнародны Алімпійскі камітэт абвесціў сваё рашэнне пазбавіць узнагарадаў чатырох пераможцаў Алімпійскіх гульняў 2004 г. Сярод іх кідальнік молата Іван Ціхан ды кідальніца дыска Ірына Ятчанка.
На алімпійскіх гульнях у Афінах гэтыя атлеты заваявалі адпаведна срэбны і бронзавы медалі ў сваіх дысцыплінах. Паводле МАК, допінг-пробы беларускіх спартоўцаў пацвердзілі ўжыванне забароненых прэпаратаў.
Аддаць свае медалі маюць таксама ўкраінец Юрый Беланог і расейка Святлана Крывелева (штурханне ядра).
МАК заклікаў Нацыянальныя камітэты Беларусі, Расеі ды Украіны як мага хучэй вярнуць медалі ды сертыфікаты спартоўцаў, якіх прызналі вінаватымі ў выкарыстанні допінгу.
Раней трохразовы чэмпіён свету Іван Ціхан таксама страціў свой бронзавы медаль, заваяваны на Алімпіядзе-2008 у Пекіне, але гэтае рашэнне было адмененае ў Спартовым арбітражным судзе ў звязку з працэдурнаю памылкаю лабараторыі.
Зміцер Ягораў
belsat.eu
