У менскай кватэры амаль тры гады праляжала муміфікаванае цела жанчыны. Увесь гэты час на пліце гарэў газ, з крану цякла вада, а ў скрыні ўжо не змяшчаліся рахункі за ЖКГ. Памяшканне ўскрылі, толькі калі ў суседкі знізу пачало капаць са столі. Згодна з паведамленнямі медыяў, такія муміфікаваныя целы людзей знаходзяць ува ўсім свеце кожны месяц. Звычайна працэс муміфікацыі адбываецца ў сухіх памяшканнях з добрай вентыляцыяй, калі працэсы высыхання пераважаюць над працэсамі гніення. Апошняя хвіліна заспявае памерлых у ложку, ваннай, за сталом або на падлозе – звычайна ў самоце. Алё ёсць выключэнні.
Летась пасля смерці жыхара польскага Вроцлава паліцыя знайшла ў ягонай кватэры мумію жанчыны ў шчыльна закручанай тканіне, абсыпаную соллю. Паводле следчых, мужчына мог схаваць факт смерці сваёй маці, каб атрымліваць ейную пенсію. Жанчына, якой на момант знаходкі магло быць 87 гадоў, магла праляжаць у кватэры пяць гадоў, падае «Polsat».
Дзякуючы салёнаму і гарачаму паветру адбылася муміфікацыя цела 59-гадовага нямецкага марака Манфрэда Фрыца Баёрата, якога ў лютым 2016 года ў 100 кіламетрах ад берагоў Філіпінаў знайшлі мясцовыя рыбакі, падае «Daily Mail». Экспертыза паказала, што мужчына памёр ад інфаркту за сем дзён да гэтага.
Нябожчык спраўна аплочваў рахункі
11 гадоў праляжала ў кватэры французскага гораду Нант муміфікаванае цела мужчыны, якое паліцыя знайшла ў ліпені 2019 года. Згодна з тэрмінам прыдатнасці харчоў у ягоным халадзільніку, мужчына памёр у 2008 годзе, падае BFM TV. Уладальнік кватэры нічога не падазраваў, бо ўвесь гэты час памерлы працягваў плаціць за арэнду: на ягоным рахунку была ўключаная функцыя цыклічнага плацяжу. Мужчына 1929 года нараджэння жыў адзін і не меў сям’і.
Летась жыхарка Самары распавяла РБК, што цела яе суседа праляжала ў кватэры год. Жыхары пад’езду чулі, што ў кватэры бесперапынна цячэ вада, але паліцыянты, якія прыехалі па выкліку, адмовіліся ўскрываць хату: не было падставаў. Суседзі меркавалі, што мужчына працаваў вахтавым метадам – яго часта не было ўдома – і не білі трывогу. Труп знайшла былая жонка, якая вырашыла наведаць яго на 8 сакавіка – у жанчыны былі ключы ад кватэры.
На пачатку лютага ў кватэры ў цэнтры Масквы знайшлі парэшткі Сяргея Пэльпора, 79-гадовага нашчадка французскага роду маркізаў Лафіт дэ Пэльпор (ягоны продак патрапіў у палон пад Віцебскам падчас расейскай кампаніі Напалеона), падае «Маскоўскі камсамолец». Мужчына праляжаў у кватэры пяць гадоў. Усе гэтыя гады суседзі адчувалі непрыемны пах, але думалі, што так смярдзяць сабакі кансьержкі.
У мужчыны не было жонкі і дзяцей, апошнія дзесяць гадоў ён не камунікаваў са сваякамі. Тыя распавялі, што ў маркіза была манія велічы.
«У ассяроддзі кожнага з нас ёсць нейкі закрыты або дзіўнаваты чалавек, з якім усім неяк нялёгка размаўляць, ды і не надта хочацца. У такога чалавека не заўсёды сярод знаёмых знойдзецца хоць нехта, каму ён будзе цікавы настолькі, каб пераканацца, дзе ён падзеўся, ці жывы ён яшчэ», – распавядаў журналістам «Медузы» адзін са следчых.
Мумія ў чахле ад снаўборду
У 68-гадовай настаўніцы музыкі Валянціны Абрамавай з-пад Тулы ані сяброў, ані сваякоў не было: жанчына праляжала мёртвай у кватэры 13 гадоў. За гэты час жанчыну выпісалі з памяшкання, а калі ў пад’ездзе мянялі трубы, камунікацыі праклалі ў абыход кватэры. Дзверы ўскрылі толькі тады, калі адна з суседак папрасіла гарадскую адміністрацыю прадставіць кватэру, у якой ніхто не жыве, ейнаму брату, у якога згарэла жытло.
«Мумія як мумія. Такая як у фільмах паказваюць пра егіпецкія грабніцы», – распавёў следчы, які прыбыў на месца знаходкі.
Згодна з даследаваннем 2015 года, сярод мужчынаў і жанчын пасля 50 гадоў у шлюбе знаходзіліся толькі 58 %, а 3 % – ніколі ў шлюб не ўступалі. Улады не вядуць статыстыкі людзей, якія паміраюць у самоце, але Следчы камітэт Расеі прызнаецца, што з кожным годам іх становіцца ўсё больш: толькі ў кватэрах Маскоўскага раёну муміфікаваныя целы знаходзяць прынамсі два разы ў месяц, прызнаваўся журналістам прадстаўнік гэтага ведамства.
Знаходзяць муміі не толькі ў кватэрах. Гэтак, у жніўні 2019 года муміфікаванае цела мужчыны знайшлі ў чахле ад снаўборду ў адным з маскоўскіх гаражоў – памерлы мужчына праляжаў у ім чатыры месяцы.
Муміі ў Беларусі
У студзені 2017 года жыхары аднаго са шматпавярховікаў Гомля заявілі аб знаходцы ў пад’ездзе немаўляці – дзяўчынка была жывая, яе стан быў задавальняючы.
Па бірцы на руцэ з радзільні міліцыя вылічылі маці. Калі ў яе пошуках міліцыянты наведаліся ў кватэру ейнага сужыцеля, то знайшлі там іншае немаўля: трохмесячная дзяўчынка ляжала ў ложку, але была цалкам муміфікаваная.
Следства ўсталявала, што сужыцель яе маці, імаверны бацька дзяўчынкі, задушыў яе падчас сваркі з партнёркай.
Пасля сваркі дарослыя гэтак і пакінулі цела, а самі пайшлі валацужнічаць.
10 муміяў бяздомнікаў у год
У студзені 2007 года бяздомнікі знайшлі муміфікаванае цела мужчыны ў калодзежы цеплатрасы каля будынку падатковай інспекцыі Ленінскага раёну Менску. Паводле міліцыі, мужчына памёр уласнай смерцю, а ў мумію пераўтварыўся праз гарачыню і сухасць у калодзежы.
У тым жа годзе сантэхнікі знайшлі муміфікаваны труп мужчыны ў сутарэннях шматкватэрнага дома на вуліцы Варанянскага ў Менску. Як выявілася, мужчына быў прапісаны ў кватэры ў Менску, але не жыў там больш за 10 гадоў. На той момант там пражывалі двое ягоных сыноў, падавала «Еўрарадыё». Паводле міліцыі, смерць бяздомніка наступіла ад сардэчнага прыступу.
Як распавялі «Камсамольскай праўдзе» ў Дзяржаўнай службе медычных судовых экспертыз, за год на гарышчах і ў сухіх падвалах сталіцы знаходзяць каля дзесяці муміфікаваных трупаў.
На просьбу «Белсату» падзяліцца актуальнымі лічбамі ведамства параіла звяртацца да праваахоўнікаў. Рэдакцыя ўжо скіравала адпаведныя запыты ў Міністэрства ўнутраных справаў і Следчы камітэт.
ДД belsat.eu
