Міністр замежных справаў Турэччыны патэлефанаваў польскаму калегу і выказаў шкадаванне, што Турэччыну «спрабуюць паказаць як частку праблемы».
З ініцыятывы турэцкага боку 10 лістапада правялі тэлефонную размову міністры замежных справаў Турэччыны Мэўлют Чавушаглу і міністр замежных справаў Польшчы Збігнеў Раў.
Польскі бок паведамляе, што Польшча і Турэччына «будуць працаваць разам, каб супрацьстаяць выкарыстанню нелегальнай міграцыі беларускім рэжымам для гібрыднай атакі на NATO».
Турэцкі бок звяртае ўвагу на іншае: як піша дзяржаўнае агенцтва «Anadolu», Чавушаглу паведаміў польскаму калегу, што «Турэччыну спрабуюць паказаць як частку праблемы, нягледзячы на тое, што яна не датычная».
Абвінавачанні Турэччыны ды авіякампаніі «Turkish Airlines» у спрыянні міграцыйнаму крызісу ён назваў беспадстаўнымі. Міністр запрасіў тэхнічныя групы з Польшчы ў Турэччыну.
Тым часам Еўразвяз і Злучаныя Штаты маюць ідэю пакараць санкцыямі авіякампаніі, што спрыяюць міграцыйнаму крызісу, які на Захадзе лічаць гібрыднай атакаю рэжыму Лукашэнкі.
АА belsat.eu
