Падчас візіту ў Берлін Святлана Ціханоўская паразмаўляла пра будучае беларускай культуры
Сустрэча з удзелам Святланы Ціханоўскай адбылася ў «Панда тэатры». На ёй прысутнічалі беларускія пісьменнікі Альгерд Бахарэвіч, Саша Філіпенка, рэжысёр Аляксей Палуян. Праз відэасувязь падключылася і Святлана Алексіевіч.
«За апошнія 27 гадоў беларускія ўлады так і не здолелі патлумачыць сэнс уласнага існавання. Іншыя дыктатуры часам пераманьваюць на свой бок таленавітых аўтараў, а тыя аддаюць ім свае ідэі. Але ж гэты рэжым не стварыў ні ўласных кніг, ні фільмаў. Ён не здолеў распавесці сваю гісторыю свету і нават сабе самому. І таму ў рэжыму цяпер няма не толькі будучыні, але і мінулага.
Менавіта таму зараз ён спрабуе запоўніць гэтую пустату гвалтам. Але ў беларускага народу свая гісторыя ёсць: балючая і прыгожая адначасова. Да мінулага году мы жылі паасобку, паралельна, кожны ў сваім асяродку. А цяпер пабачылі адзін аднаго і наноў адкрылі для сябе краіну», – прамовіла Ціханоўская ў вітальным слове, выступаючы па-беларуску.
Пасля выступу Ціханоўскай дзеячы беларускай культуры прынялі ўдзел у дыскусіі «Культура Новай Беларусі».
У канцы імпрэзы Святлана Ціханоўская паразмаўляла з замежнымі медыя.
АД, belsat.eu
