Каля мяжы на беларускім баку застаюцца больш за дзве тысячы мігрантаў.
Памежны камітэт Беларусі заявіў 11 лістапада, што да польскай мяжы цягам дня прыбылі некалькі групаў мігрантаў, агулам каля 200 чалавек.
Беларускія памежнікі прызнаюць, што халоднае надвор’е, брак ежы і вады ствараюць пагрозу фізічнаму стану людзей. Сцвярджаюць, што медыкі на беларускім баку аказваюць дапамогу, у тым ліку дапамаглі дзвюм жанчынам з пераахалоджваннем і траўмамі галавы, аднаму дзіцяці – з пераахалоджваннем.
Памежнікі звяртаюць увагу на тое, што з польскага боку «не дапускаюць прадстаўнікоў СМІ і міжнародных ды гуманітарных арганізацыяў для дапамогі ўцекачам», прытым не зважаюць на тое, што мігранты застаюцца на тэрыторыі Беларусі – пад наглядам узброеных людзей у вайсковай форме без апазнавальных знакаў, без дастатковай колькасці ежы, вады і цёплага адзення.
Тым часам польскія памежнікі паведамляюць пра перадухіленне 468 спробаў нелегальна перайсці беларуска-польскую мяжу толькі за 10 лістапада.
У ноч на 11 лістапада група са 150 чалавек у раёне Белавежы спрабавала гвалтоўна прарвацца ў Польшчу, кідала ў памежнікаў розныя прадметы, намагалася разбурыць плот. У раёне Шудзялова мігранты напалі на польскага жаўнера, ударылі палкай у грудзі. У абодвух выпадках памежнікі не пацярпелі моцна, але былі вымушаныя страляць у паветра.
Ад гвалту на мяжы цярпяць не толькі мігранты і польскія сілавікі: блогер Антон Матолька 11 лістапада апублікаваў відэа, на якім мігранты б’юць палкамі беларускіх сілавікоў. Сцвярджаюць, што гэта адбывалася 8 лістапада, калі мігранты спрабавалі мінуць мяжу праз легальны пераход, а сілавікі іх туды не прапускалі і скіроўвалі ў лес.
Улады Беларусі рэагуюць на міграцыйны крызіс заявамі аб правакацыях і абвінавачаннямі ў бок Польшчы, Літвы і ЗША.
Аляксандр Лукашэнка на нарадзе з кіраўніцтвам Савету міністраў 11 лістапада абураўся тым, што палякі «нахабна» і «без папярэджання» сцягнулі войскі да мяжы – паводле яго, там нібыта ўжо «15 тысяч вайскоўцаў, танкі, браняваная тэхніка, верталёты паляцелі з самалётамі».
Таксама Лукашэнка заявіў, што ў лагер мігрантаў хтосьці спрабуе «перакінуць зброю і боепрыпасы, каб справакаваць канфлікт». Хто гэта робіць у лагеры на беларускай тэрыторыі пад аховаю беларускіх «зялёных чалавечкаў», ён не сказаў.
Але загадаў рэагаваць на будучы пяты пакет санкцыяў Еўразвязу: «Мы ім дараваць нічога не павінны».
Тым часам у Менску застаецца вялікая колькасць мігрантаў. Адна група сабралася з рэчамі каля Палацу спорту. Жывую трансляцыю сходу вядзе тэлеканал NRT.
АА belsat.eu