Лукашэнка прыгразіў спыніць пастаўкі газу ў Еўропу, запрасіць расейскія бамбавальнікі

Яму вельмі не спадабалася перспектыва ўвядзення пятага пакету санкцыяў Еўразвязу.

Аляксандр Лукашэнка падчас вучэнняў «Захад-2021». 12 верасня 2021 года.

Фота: president.gov.by

Аляксандр Лукашэнка правёў 11 лістапада нараду з кіраўніцтвам Савету міністраў. Дзяржаўнае інфармацыйнае агенцтва БелТА перадае, як ён абураўся з нагоды будучых санкцыяў Еўразвязу.

Што ён казаў, сцісла:

• Загадаў Міністэрству абароны, Камітэту дзяржаўнай бяспекі і памежным войскам «забяспечыць кантроль за перасоўваннем войскаў NATO і Польшчы».
• Заявіў, што да мяжы палякі падцягнулі 15 тысяч вайскоўцаў, танкі, бронетэхніку, верталёты і самалёты, а ў лагер мігрантаў на тэрыторыі Беларусі хтосьці спрабуе падкінуць зброю з Данбасу.
• Пятым пакетам санкцыяў Еўразвязу «зашмат пачалі пужаць», таму прэм’еру даручыў: «Мы ім дараваць нічога не павінны».

• Лукашэнка прасіў Міністэрства абароны Расеі накіраваць на дзяжурства на беларускія межы стратэгічныя бамбавальнікі, здольныя несці ядзерную зброю. Але не каб атакаваць, а каб маніторыць сітуацыю на межах.
• Заявіў, што на мяжы «поўная катастрофа»: вельмі шмат цяжарных жанчын на 8-9 месяцы – дапусціў, што яны будуць нараджаць у Беларусі, што іх забяруць у беларускія лякарні.
• Прапанаваў Наталлі Качанавай праверыць, ці не захочуць мігранты аддаць сваіх дзяцей беларускім уладам, каб іх пасялілі ў санаторый.
• Мігранты «пачынаюць ужо надаваць увагу беларуска-украінскай мяжы».

• Даручыў прывезці сухіх дроваў у лагер уцекачоў, які 8 лістапада з’явіўся на беларускай тэрыторыі каля польскай мяжы.
• Абурыўся тым, што польскія вайскоўцы дзейнічаюць «як фашысты, гестапа», у тым ліку не даюць вады дзецям мігрантаў (якія знаходзяцца на тэрыторыі Беларусі пад кантролем беларускіх байцоў без апазнавальных знакаў).
• Назваў такія лічбы: 1790 чалавек у лагеры на беларускім боку і яшчэ 322 чалавекі, якія нібыта сядзяць на польскім баку, нягледзячы на тое, што іх нібыта «спрабавалі выпхнуць на беларускую тэрыторыю». Потым заявіў, што выштурхнуць спрабавалі ўжо тысячу чалавек.

• Назваў недапушчальным тое, што польскія памежнікі стралялі ў паветра (польскі бок паведамляў, што стралялі, калі іх атакавалі мігранты). Пра тое, што беларускія памежнікі страляюць на мяжы ўжо некалькі месяцаў, не згадаў.
• Ухваліў ідэю Польшчы цалкам закрыць мяжу, бо тады «менш беглых туды будзе перамяшчацца». Але спытаў, што будзе, калі ён сам закрые транзіт праз Беларусь.
• Прыгразіў закрыць транзіт прыроднага газу з Расеі праз Беларусь у Еўропу.

Пра газ – сур’ёзная пагроза?

Непрыемная, але наўрад ці крытычная. Транзіт расейскага газу ў Еўропу ідзе як праз Беларусь, так і праз Украіну, і праз Балтыйскае мора. «Газпрам» збіраўся карыстацца толькі трацінай магутнасцей беларускіх трубаў газапроваду «Ямал-Еўропа», бо газ хочуць пусціць праз «Паўночны паток-2». Пры тым былі даступныя і дадатковыя магутнасці ўкраінскага газапроваду, якімі расейцы пакуль не карыстаюцца.

АА belsat.eu