«Чарговы форс-мажор, з якім трэба працаваць». Як сітуацыя на мяжы паўплывала на грузаперавозкі?
Міграцыйны крызіс, які набірае абаротаў з беларускага боку беларуска-польскай мяжы, паставіў пад пагрозу і транзітныя перавозкі праз Беларусь.
Хто першы закрые мяжу?
Пасля таго як 8 лістапада з беларускага боку вялікая калона мігрантаў паспрабавала прарвацца ў Польшчу, Варшава 9 лістапада цалкам закрыла пункт пропуску Кузніца (у Беларусі – Брузгі).
Больш за тое, польскія ўлады разглядаюць варыянт цалкам закрыць мяжу з Беларуссю.
«У далейшых сцэнарах такі варыянт улічваецца. Цяпер мы адназначна накіроўваем дыпламатычнымі ды афіцыйнымі каналамі такую інфармацыю ўладам Беларусі, што такая пагроза існуе, калі ўлады Беларусі не спыняць гібрыднай вайны на мяжы», – паведаміў прэс-сакратар ураду Польшчы Пётр Мюлер.
Але з боку ўладаў Беларусі рэакцыя цалкам адваротная.
«Польшча нас палохае, што закрые мяжу. Калі ласка, закрывайце: менш уцеклых туды будзе перамяшчацца», – заявіў 11 лістапада Аляксандр Лукашэнка.
Пры гэтым ён сам прыгразіў закрыць мяжу «для палякаў і, напрыклад, для немцаў».
Чэргі растуць
Тым часам чэргі на пераходах на беларуска-польскай мяжы толькі растуць. Паводле звестак Дзяржаўнага памежнага камітэту Беларусі, на 14:00 11 лістапада выезду з краіны чакалі толькі каля 170 фураў: больш як 110 у Бераставіцы і больш як 60 у Беняконях.
А напярэдадні на ўезд у Беларусі чарга з фураў перад памежным пераходам Баброўнікі, што з польскага боку насупраць Бераставіцы, расцягнулася амаль на 28 кіламетраў. Менавіта сюды паехала значная частка тых, хто раней планаваў ехаць праз Кузніцу.
«Прыглядаемся да сітуацыі»
У ананімным каментары «Белсату» прадстаўнік адной з буйных лагістычных кампаніяў Беларусі заявіў, што перавознікі пакуль прыглядаюцца да сітуацыі:
«Пакуль няма чаго сказаць. Прыглядаемся да сітуацыі. Трэба трошкі пачакаць. Пакуль проста не едзем на Кузніцу, і ўсё. Усе чакаюць».
Паводле яго, кліенты пытаюць, што і як, але «яшчэ нясмела, бо ўсе разумеюць, што пакуль перайшлі на іншыя пераходы».
«Чарговы форс-мажор, з якім трэба працаваць», – падкрэсліў прадстаўнік лагістычнай кампаніі.
«Зусім непрыбыткова будзе працаваць»
Адна з галоўных праблемаў, з якою сутыкнуліся дальнабойнікі, заключаецца ў тым, што знікла набытая раней электронная чарга на пераходзе Кузніца – Брузгі.
«Кіроўцам, якія меліся выязджаць у нядзелю ў пэўны час і не хвалявацца, цяпер трэба выязджаць у пятніцу і стаяць у чарзе на «Баброўнікі». Чарга там то павялічваецца, то змяншаецца. Раніцаю было 60 машынаў, а ўчора цэлы дзень – недзе 170», – кажа іншы суразмоўца з іншай лагістычнай кампаніі.
«Усе засмучаныя», – кажа суразмоўца.
У выпадку ж поўнага закрыцця транзіту на беларуска-польскай мяжы невялікія лагістычныя фірмы, якія працуюць на Польшчу і Нямеччыну, могуць сутыкнуцца з вялікімі праблемамі: «зусім непрыбыткова будзе працаваць». У вялікіх кампаніяў застануцца варыянты дыверсіфікацыі паставак.
ПС belsat.eu
