На гэта адкажуць санкцыямі. Таксама трываюць перамовы з краінамі паходжання і транзіту мігрантаў.
Вярхоўны прадстаўнік Еўразвязу ў справах замежнай палітыкі Жузэп Бурэль выступіў з заявай ад імя Еўразвязу адносна міграцыйнага крызісу на беларускіх межах.
Падзеі на межах Беларусі Бурэль называе спланаваным выкарыстаннем беларускім рэжымам уразлівых людзей у якасці інструмента для дасягнення палітычных мэтаў. І гэта, піша ён, набывае трывожнае вымярэнне: групы мігрантаў у суправаджэнні ўзброеных сілавікоў спрабуюць прарвацца праз межы Еўразвязу.
«Гэта сведчыць пра цынізм беларускага рэжыму, які, распальваючы крызіс на вонкавых межах Еўразвязу, спрабуе адцягнуць увагу ад сітуацыі ў краіне, дзе жорсткія рэпрэсіі ды парушэнні правоў чалавека працягваюцца і нават пагаршаюцца», – піша Бурэль.
Еўразвяз асуджае рэжым Аляксандра Лукашэнкі за тое, што той свядома ставіць пад пагрозу жыццё і дабрабыт людзей, парушае міжнароднае права ды ігнаруе фундаментальныя правы чалавека, адносна якіх Беларусь сама ўсклала на сябе абавязкі.
«Такія бесчалавечныя дзеянні патрабуюць рашучай міжнароднай рэакцыі і супрацы дзеля прыцягнення рэжыму ў Беларусі да адказнасці за гэтыя парушэнні, – дадае Бурэль. – Міжнародным арганізацыям неабходна даць неадкладны і бесперашкодны доступ да людзей, каб даставіць ім гуманітарную дапамогу».
Паводле Бурэля, Еўразвяз узаемадзейнічае з краінамі паходжання і транзіту мігрантаў, каб спыніць дзеянні Лукашэнкі, а таксама збіраецца пашыраць санкцыі на ўдзельнікаў ды паплечнікаў рэжыму Лукашэнкі.
АА belsat.eu