Беларускія аналітычныя тэлеграм-каналы даволі актыўна абмяркоўваюць стварэнне падчас канферэнцыі «Новая Беларусь» у Вільні Пераходнага кабінету. І нават маюць пэўны аптымізм адносна далейшага развіцця сітуацыі.
9 жніўня на канферэнцыі «Новая Беларусь» Святлана Ціханоўская абвясціла пра стварэнне пераходнага кабінету. У яго склад увайшлі чатыры асобы. Прадстаўнік Святланы Ціханоўскай у міжнародных справах, былы дыпламат Валер Кавалеўскі стаў цяпер прадстаўніком Кабінету ў замежных справах. Яшчэ адзін былы дыпламат і былы міністр культуры, а цяпер кіраўнік Народнага антыкрызіснага ўпраўлення Павел Латушка будзе адказваць у Кабінеце за транзіт улады.
Прадстаўніком Кабінету ў аднаўленні правапарадку стаў былы палкоўнік міліцыі, а цяпер кіраўнік BYPOL Аляксандр Азараў. А вось сферай абароны і нацыянальнай бяспекі будзе адказваць камандзір палка «Пагоня», былы кіраўнік Берасцейскай дэсантнай брыгады падпалкоўнік Валер Сахашчык.
«Упершыню за доўгі час дэмсілам атрымалася згуляць праактыўна. Мала хто на тым баку верыў у тое, што ўжо па выніках другога дня канферэнцыі будуць прыняты рашэнні і перафарматаваны кабінет. Хунта баіцца любых зладжаных дзеянняў. 2020 паказаў, што нават часовыя саюзы здольныя даваць вынік. У кабінетах і калідорах стан ад трывогі да лёгкай панікі», – пішуць «Ник и Майк».
Пры гэтым, на думку аўтараў каналу, стварэнне Кабінету з уключэннем у яго ў якасці «міністра» абароны падпалкоўніка Валера Сахашчыка – «адзін з апошніх козыраў у дэмакратычных сілаў».
«І вельмі важна правільна распарадзіцца тым даверам, які выклікаў Сахашчык у публікі. Стаўкі павышаныя да мяжы», – адзначаюць «Ник и Майк».
У сваю чаргу канал «Рефлексия и реакция» паведамляе, што «кабінет, урад – неабходная (але недастатковая) умова для стварэння таго самага двоеўладдзя, якога не здарылася ў 2020-м».
«Калі б ён з’явіўся 2 гады таму – ён рызыкаваў бы стаць чарговай пустой ініцыятывай. Але, супастаўляючы ўсё, што адбываецца зараз, на розум прыходзіць выснова – зараз беларускае пытанне гэта ўжо не толькі праблема Беларусі. Больш за тое, канфлікт у рэгіёне настолькі моцны, што па-за жаданнем ці нежаданнем беларускага народу, ціск звонку на бягучы рэжым будзе незвычайна моцным. На фоне слабой Расеі. На фоне крыкаў прапагандыстаў аб тым, што вертыкаль недастаткова заўзята ўдзельнічае ў рэпрэсіях», – піша аўтар каналу.
Тым не менш, піша CYNIC, Кабінет мусіць навучыцца «кіраваць унутраным і вонкавым парадкам дня» і знайсці выканаўцаў «на месцах».
«Каб працэс расхіствання ўлады адбываўся ўвесь час, трэба мець «пад дываном» маштабны пратэставы рух, які не будзе займацца нічым асабліва яскравым і выбітным, але ён павінен неўзаметку капаць «падземныя сцежкі» пад Палацам», – адзначае CYNIC.
На думку ягонага аўтара, у дэмакратычных сілаў цяпер «няма акна магчымасцяў для знішчэння рэжыму Лукашэнкі», але яно можа з’явіцца, калі Расея прайграе вайну ва Украіне і пойдзе «залізваць раны».
«Але фортачка ў «Новую Беларусь» будзе адчыненая вельмі нядоўга. І тым больш яна не з’явіцца, калі вайна скончыцца абмежаванай перамогай Крамля і фашызму», – падкрэслівае CYNIC.
Паводле яго, Беларусі патрэбны актыў, які працуе ўнутры і падрыхтаваны звонку, які можа ўступіць у гульню маментальна – «у момант капітуляцыі Масквы».
У сваю чаргу журналіст і аналітык Валер Цыганкоў разглядае нязгоду замежных актараў падтрымаць «сілавы варыянт» змены ўладаў у Беларусі. На ягоную думку, гэта праўдзіва толькі з адной агаворкай – «на сённяшні дзень».
«Бо сітуацыя можа памяняцца ў любы момант. Адзін прыклад. Калі Масква ўсё ж прымусіць [Аляксандра Лукашэнку. – Рэд. Belsat.eu] увесці войскі ў вайну супраць Украіны – як тады будзе выглядаць рэалістычнасць і прывабнасць «сілавога варыянта» для суседзяў Беларусі? Падазраю, што пры такім развіцці падзеяў гэта можа стаць для іх галоўным і ці не адзіным варыянтам. Яны самыя прыйдуць да Азарава і Сахашчыка і будуць пытацца – «Гаварыце, чаго не хапае палку Каліноўскага?» – мяркуе журналіст.
Каментаваць канферэнцыю «Новая Беларусь» можна і ў нашым тэлеграм-канале.
Макар Мыш belsat.eu