Траіх удзельнікаў пратэстаў вінавацяць у пагрозе прымянення гвалту ў дачыненні да сілавікоў. Іх затрымаў ГУБАЗіК.
Інцыдэнт адбыўся 11 жніўня 2020 года на вуліцы Прытыцкага падчас жорсткага разгону пратэстаў ля станцыі метро «Каменная горка». Трое маладых людзей скінулі з агульнага гаўбца шматпавярховіка драўляныя дзверы. Такім чынам яны хацелі спыніць амапаўцаў, якія жорстка збівалі чалавека каля пад’езду.
Відэа інцыдэнту год таму трапіла ў сеціва. На запісу бачна, што, пераследуючы пратэстоўцаў, у двор забягае група сілавікоў: яны валяць на зямлю мужчыну, які падняў рукі над галавой, а затым пачынаюць яго збіваць дубінкамі і нагамі. На відэа чуваць, што людзі з вокнаў патрабуюць спыніць збіццё. Пасля гэтага ўніз ляцяць дзверы, якія падаюць у некалькіх метрах ад сілавікоў.
Паводле МУС, дваім затрыманым па 23 гады, трэцяму – 24. Адзін з іх раней судзімы за наўмыснае прычыненне цяжкага цялеснага пашкоджання, ужываў наркотыкі, сцвярджаюць у міліцыі.
Затрыманыя змешчаныя ў ізалятар, яны знаходзяцца ў статусе падазраваных па крымінальнай справе.
ІІ belsat.eu