Вынесены прысуд удзельніку пратэстаў у Маладзечне, байцу ММА Аляксею Кудзіну, якога затрымалі ў Расеі ў студзені і экстрадавалі ў Беларусь у канцы ліпеня.
Суддзя Вольга Дубовік прысудзіла Кудзіну 2,5 года калоніі. Гэта на год менш, чым запытваў пракурор Жук.
Аляксея Кудзіна абвінавацілі паводле ч. 2 арт. 363 КК («Супраціў супрацоўніку органаў унутраных справаў або іншай асобе, якая ахоўвае грамадскі парадак, спалучаны з ужываннем гвалту або з пагрозай яго ўжывання»).
Пацярпелымі ў справе прызналі прапаршчыка ўнутраных войскаў Яндолу і падпалкоўніка Зорына.
Нагадаем, што Кудзіна затрымалі пасля акцыі пратэсту ў Маладзечне 10 жніўня, тады ў яго стралялі. Спартоўца адпусцілі 21 жніўня, завёўшы супраць яго крымінальную справу і абраўшы меру стрымання ў выглядзе хатняга арышту.
На пазначанае судовае паседжанне 19 лістапада Кудзін не з’явіўся, і суддзя змяніла яму меру стрымання на ўзяцце пад варту, а яго самога афіцыйна абвесцілі ў вышук.
У студзені 2021-га стала вядома аб затрыманні Кудзіна ў Маскве на запыт уладаў Беларусі. Пасля гэтага Генпракуратура Беларусі накіравала ў Расею зварот аб экстрадыцыі. У абарону Аляксея Кудзіна выступілі беларускія і расейскія спартоўцы.
Еўрапейскі суд правоў чалавека 21 ліпеня забараніў экстрадыцыю байца ў Беларусь – ён пагадзіўся з довадамі пра пераслед і магчымае катаванне. Аднак маскоўскі апеляцыйны суд не адмяніў пастановы аб выдачы байца ММА Аляксея Кудзіна ў Беларусь, нягледзячы на забарону Еўрапейскага суда правоў чалавека.
Кудзіна даставілі ў Менск, дзе адразу ж запісалі відэа для праўладных тэлеграм-каналаў.
АД, belsat.eu
