Belsat.eu падводзіць вынікі 11 ліпеня – 337-га дня супрацьстаяння грамадства і ўладаў.
Раніцай 8 ліпеня ў Казмерчака адбыўся ператрус, у яго забралі ноутбук і тэлефон, а потым павезлі на допыт. Рэдактар быў затрыманы на 72 гадзіны ў межах крымінальнай справы паводле арт. 341 КК РБ, нібыта за псаванне гарадскіх пабудоваў надпісамі палітычнага зместу. Пра якія аб’екты гарадской інфраструктуры вядзецца гаворка – не вядома.
Цяпер на волі ўжо журналіст «Белсату» Зміцер Лупач і актывіст Аляксандр Шарабайка. У Докшыцах выйшлі настаўнік Арцём Стадольнік, юрыст і былы следчы Юрый Мацяюн і бухгалтарка Вераніка Судніковіч.
Мінула 72 гадзіны з моманту затрымання Ягора Марціновіча, Андрэя Дынька, Андрэя Скурка і Вольгі Раковіч, аднак на свабоду яны не выйшлі. Ні адвакатам, ні сваякам следчыя нічога не паведамілі.
Віталь Цыганкоў таксама паведаміў, што працягвае працаваць для радыё «Свабода» і плануе новы сезон «Размовы» на «Белсаце»:
«Я буду заставацца сабой, буду працягваць. З любога геаграфічнага месца. Місія яшчэ не выкананая».
10 ліпеня ў Варшаве прайшла імпрэза, арганізаваная ў стылі беларускіх дваровых акцыяў. Пасля леташніх выбараў, перадусім у Менску, дваровыя канцэрты і імпрэзы арганізоўваліся рэгулярна да глыбокай восені. Сёлета актывісты беларускай дыяспары працягваюць акцыі ў такім фармаце за мяжою.
Арганізатарам імпрэзы выступіў Беларускі дом у Варшаве.
Сёння ў межах Міжнароднага тыдня беларускай культуры ў Вільні адбудзецца канцэрт «Культура мацнейшая за дыктатуру!».
У канцэрце бяруць удзел Лявон Вольскі, Маргарыта Ляўчук, Андрэй Павук, Сяргей Kosmas.
Канцэрт пройдзе ў Вільні ва ўнутраным дворыку ЕГУ.
МГМ, belsat.eu