Палітычнага вязня Сцяпана Латыпава з плошчы Пераменаў змясцілі ў памяшканне камернага тыпу на цэлых пяць месяцаў, паведамляюць праваабаронцы.
Паводле сваякоў Сцяпана, за першыя два тыдні ў ПКТ ён атрымаў толькі два лісты.
«У сваім лісце Сцяпан шкадуе, што правядзе лета ў камеры: ён не паспеў нарадавацца кветкам увесну. Прасіў пісаць часцей», – паведамляюць праваабаронцы.
Памяшканне камернага тыпу – распаўсюджаны метад ціску. Гэта такая спецыяльная камера, дзе вязні маюць права атаварвацца ў турэмнай краме на адну базавую велічыню за месяц, атрымліваць адну бандэроль цягам шасці месяцаў, мець штодзённы шпацыр на 30 хвілінаў і хадзіць на працу.
Сцяпана Латыпава асудзілі амаль год таму, 16 жніўня, да 8,5 года калоніі ва ўмовах узмоцненага рэжыму і аштрафавалі на 300 базавых велічыняў. Ён адбывае тэрмін у калоніі «Воўчыя норы».
За пяць месяцаў у калоніі Латыпава змяшчалі ў ШІЗА агулам на 32 дні, 27 з каторых ён адбыў у лютым.
Праваабаронцы запусцілі падлік лістоў, каб Сцяпан ведаў, колькі людзей яму піша. Падтрымаць вязня можна, напісаўшы на адрас: ПК № 22, ст. Даманава, а/с 20, 225295, Івацэвічы, Берасцейская вобласць.
Алена Рувіна belsat.eu
