Калі патрабаванні не будуць задаволеныя пасля 10 дзён, палітвязень гатовы перайсці да сухой галадоўкі. Ён галадае ўжо 8 дзён, а наперадзе выходныя.
Вядомы беларускі філосаф, метадолаг і грамадскі дзеяч, вядоўца «Белсату» Уладзімір Мацкевіч 4 лютага пачаў галадоўку: яго больш за паўгода трымаюць у няволі без суда і, як ён кажа, без следства. Ён дамагаецца змены меры стрымання і спынення «імітацыі следчага працэсу», перадачы справы ў суд.
Восьмы дзень галадоўкі, а гэта 11 лютага, ужо цяжкі для здароўя галадоўніка. Але рэч не толькі ў гэтым: калі патрабаванні не будуць задаволеныя праз 10 дзён галадавання, Мацкевіч казаў, што гатовы перайсці да сухой галадоўкі – адмовіцца не толькі ад ежы, але і ад вады.
Святлана Мацкевіч, метадолаг і калега Уладзіміра, кажа «Белсату»: цяперашні стан здароўя галадоўніка невядомы, а актыўных дзеянняў з боку тых, хто мог бы выканаць ягоныя патрабаванні, не відаць. Яна запэўнівае, што не ў адчаі, але жадае рабіць усё магчымае.
«Сітуацыя не рухаецца, – заўважае Святлана Мацкевіч. – Гэта, натуральна нас вельмі моцна непакоіць, блізкіх і родных, калегаў і паплечнікаў.
Я думаю, мы мусім больш пра гэта казаць, перадаваць на той бок сваю занепакоенасць і настойлівасць».
Пятніца – апошні дзень перад выходнымі, калі адміністратыўная сістэма «завісае і не працуе», адзначае яна. А ў гэтыя дні зняволены якраз і будзе прымаць рашэнне пра сухую галадоўку.
Ці ёсць надзея? Святлана кажа, што «не можа казаць за той бок» і не мае ілюзіяў адносна магчымасці «цуду» – вызвалення і спынення справы. Яна называе сябе прыхільніцай такога падыходу:
«Трэба штосьці рабіць, трэба казаць таму боку, каб яны паскаралі працэс, каб усё ж прымалі рашэнне, бо мы не будзем разнявольвацца.
Чым долей яны не прымаюць рашэння, тым мацнейшыя з нашага боку будзе напор і патрабаванні.
Трэба проста прымушаць іх выконваць свае абавязкі. Прымушаць не павышаць ступень напружанасці ў тым, што залежыць ад іх.
З нашага боку мы ўжо зрабілі ўсё, што трэба. І мы, і Уладзімір свае патрабаванні выразна пазначылі, абгрунтавалі, патлумачылі з розных бакоў».
Святлана прапаноўвае розныя шляхі падтрымаць Уладзіміра Мацкевіча:
«Трэба казаць, што філосаф – гэта наш нацыянальны здабытак, – дадае Святлана Мацкевіч. – Што філосаф важны нам не толькі як чалавек, а важны і тым, што ён дае нам і ўсёй краіне. Ён дае нам мысленне, ён дае нам магчымасць разважаць, захоўваць годнасць у вельмі складанай сітуацыі палітычнага крызісу, захаванне нашых каштоўнасцеяў, разуменне дабра і зла.
Што можа быць прасцей, чым сказаць, што для цябе гэтая каштоўнасць важная, што ты на баку дабра?»
Святлана дадае, што ў гэтай сітуацыі не варта спрачацца і канфліктаваць, а менавіта выходзіць на просты і лаканічны ўзровень: мы на баку дабра.
АА belsat.eu