Палітвязню Юрыю Вершуку, якога асудзілі на два гады «хіміі» за каментар пад відэа са старшынём Гомельскага аблвыканкаму, змянілі пакаранне з «хіміі» на «хатнюю хімію». Пра гэта паведамляе «Вясна».
Пакаранне на больш мяккае змянілі ў выніку памілавання. «Хімію» ён адбываў ў ПУАТ № 36.
38-гадовы берасцеец Уладзімір Шурубейка, асуджаны на 2 гады «хіміі» за «абразу прадстаўніка ўлады», 5 студзеня быў пераведзены на «хатнюю хімію», ён ужо ўдома. Мужчыну пакаралі за тое, што ў Viber-чаце размясціў негатыўную ацэнку сілавіка з утрыманнем словаў «с*кло, чмо і ныцік».
Таксама на «хатнюю хімію» перавялі 50-гадовага менчука Яраслава Збароўскага. Яго асудзілі за «грубае парушэнне парадку» на тры гады «хіміі» і сканфіскавалі машыну – за ўдзел у пратэстах уначы з 10 на 11 жніўня каля менскага гандлёвага цэнтру «Рыга». Збароўскага затрымалі 25 верасня 2020 года, сем месяцаў трымалі ў няволі да суда. Ён не прызнаў віны, а на «відэадоказах» у судзе яго папросту не было.
Але 22-гадоваму жыхару Гомля Дзмітрыю Гопту, якога асудзілі на 2 гады калоніі за тое, што ён нібыта шпурнуў камень у бок міліцыянтаў, адмовілі ў памілаванні, нягледзячы на тое, што ён мае ментальную хваробу, якая патрабуе догляду і лячэння.
МГ belsat.eu
